ايه الناس دى؟

ايه الهبل و القرف ده؟

هو خلاص خلصنا اللى عندنا و فوقنا عشان غيرنا؟

لا و غيرنا دول مين؟ دول الجيش الاسرائيلي

ما هو مش هنلاقى اهل غزة يعنى واقفين لنا ع الحدود عشان يقولولنا متشكرين

احنا اتحررنا من مسيرتكم دى

لا

اللى ع الحدود دلوقتى و متحفزين هما القوات الاسرائيلية بكافة فصائلها

ايه الهدف يعنى نفسي اعرف

تضامن

ما خلاص معروف اننا متضامنين و للاسف مش قادرين ولا هنقدر نعمل الا اننا نشجب و ندين

ببساطة لاننا مش اد العالم كله اللى مؤيد و مساند لاسرائيل

يبقى نعقل كده و نهمد شوية و نرحم جيشنا و بلدنا من السخافات بتاعة المسيرات و الاضرابات و المظاهرات اللى عمال على بطال

نركز فى التنمية و التطوير للبلد اللى خربت دى

بدال ما ندخل نفسنا فى مواقف محدش هيندم عليها غيرنا

ده ما اتحملناش بعض فى مظاهرات سلمية هنا ف مصر و كنا مصريين مع بعض

نقوم نروح للعدو برجلينا و نطلع له لساننا باستخفاف

صحيح على رأى اللى قال

هبلة و مسكوها طبلة

ملحوظة يا جماعة

انا مش خاينة ولا عميلة ولا من الفلول و الفلافل

انا واحدة بتحب بلدها جدا جدا جدا فوق ما اى حد ممكن يتخيل