مديرية الامن بالدقهلية عارفين مكانها فين؟
فى شارع الجمهورية او شارع البحر زى ما بنقول عليه هنا فى المنصورة
تلاقيها ادام كوبرى طلخا
فى ضهر قسم اول المنصورة
ناصية شارعى بورسعيد و العباسي
باهم ميدان بالمنصورة
لو عاوز تروح طلخا
او المحافظة
او الاسواق التجارية
او المستشفيات الكبرى
لازم تعدى من ادامها
طيب لما يحصل مظاهرات و يتقفل المكان ده
بيحصل ايه؟
بيحصل شلل مرورى ممكن يوصل لشلل بنى ادمى كمان بكل المنصورة
وده حصل؟
ايوة حصل
من تلات ايام
و للاسف اللى عملوا كده هم افراد منتمين لمديرية الامن و للداخلية نفسها عملوا ايه؟
عملهم اسود
تعالوا نشوف

طبعا من شهور بنسمع عن مظاهرات لامناء الشرطة علشان مطالبتهم برجوع زملائهم المفصولين و اللى اتاخدوا كبش فدا لاوامر الكبار ايام الثورة
و تعاطفنا كلنا معاهم لما طالبوا بعدم محاكمتهم عسكريا و يتحاكموا زى المدنيين
لانهم فى الاخر بينفذوا اوامر و بس
التعاطف ده مننا لان مطالبهم مشروعة
و كانت بطريقة سلمية و مهذبة
بس لما تتحول لطريقة همجية و فوضوية
و توصل للبلطجة
فدى حاجة تثير الاشمئزاز - مش بس الغضب
يعنى ايه لزومه امناء الشرطة اللى بالمطار يقتحموا الصالة و يعطلوا العمل بيها؟
ايه لزمته ان امناء الشرطة يحاوطوا مديريات الامن زيهم زى البلطجية و اهالى المسجونين؟
ايه لزمته ان امناء الشرطة يسيبوا مواقعهم و الاقسام من غير حماية
و يتسببوا فى اكتر من محاولة لتهريب المساجين من بعض الاهالى
اللى حرقوا و كسروا بعض اقسام الشرطة - زى قسم العاشر و اخر بالشرقية و غيرهم؟
انما الوضع بقى عندنا فى المنصورة اخد شكل تانى خالص
نحن نختلف عن الاخرون معلش يعنى
ازاى بقى؟
نشوف

الموضوع ابتدى بمظاهرات عادية جدا
بعدها قطع الطريق فى ارع الجمهورية و توقف الطرق كلها بالمنصورة
بعدها تطويقهم لمديرية الامن
بعدها قفل بوابة المديرية من الخارج بالجنازير و الحديد لمنع مدير الامن من الدخول
فالراجل اتصرف و دخل من باب المساجين اللى فى الخلف!!!!!!!!!!!!!!!!
و بعدين لما نزل يطلب وفد منهم يتفاهم معاه
حاوطوه و كانوا هيضربوه لولا الامن بتاعه خرجوه بالعافيه
اه و الله بالعافية
طيب وزير الداخلية قال انه مطالبهم هتتحقق خلاص بس يرجعوا لمواقعهم تانى و يؤدوا واجبهم الوطنى و كفاية اللى البلد فيه
الرد ايه بقى؟
"لالالالالالالالالا.. السقف على دلوقتى.."
طيب ايه المطلوب
الوزير يرحل.. ويرحل يعنى يمشي..
و بعدها
عاوزين زيادة رواتبنا
و حافز الاثابة اللى هو 200%
و بدل مواصلات
و تحديد ساعات العمل
و تثقيف الامناء زيهم زى الظباط
يا كده يا مش راجعين
طب ارجعوا و نتفاهم
لا مفيش تفاهم الا لما مطالبنا تتحقق

بلطجة
و همجية
انما العيب بجد مش عليهم
العيب على الحكومة اللى قالت
هنعمل و هندى و الخير كتير
اشربى بقى يا حكومة يا مايلة
و شغلى يا داخلية اغنية السندريلا
و قولوا معاها
"متقولش امين شرطة اسم الله"

ايه شغل الاطفال ده؟

و الله ياتوتى ده مش شغل اطفال
ده شغل البلطجة اللى اتعود عليه امناء الشرطة و من زمان
عارفة بقى ايه اللى حصل بعد كده؟
فى مركز ميت غمر - اخر حدود الدقهليه
منعوا المأمور من دخول القسم
و هددوا بحرق القسم
و قطعوا الطريق بتاع المنصورة - القاهرة
و ف قرية اسمها بسنديلة
حاول الاهالى تهريب المساجين و حرق القسم
بس الاهالى سيطروا على الحريق و رجعوا المساجين
المنصورة بقى كانت زايطة
الامناء اخلوا مبنى المديرية بالكامل بالقوة
حتى المدنيين اللى بيكتبوا المحاضر نزلوهم الشارع بالعافية و منعوهم من عملهم
و قفلوا شارع البحر تماما
و للحظ ان مصطفى كان واصل يومها
و الباص رفض يدخله البلد
و نزلوا الركاب على الكوبرى السريع بره المنصورة
طبعا لان البلد بالكامل تعتبر مقفولة
طبعا الاضراب لسه مفضوض اول امبارح
بس مع وعود بالعودة
على نظام
فاصل و نواصل
مشكورة على المرور يا قمراية