الموضوع في منتهي الغرابة والله
وفيق حكى لي النهاردة موقف خلاني محتارة
اضحك ولا ابكي ولا اصرخ ولا اشد في شعري
الموضوع وما فيه انه كان في الشغل في منطقة الدقي
وفجأة سمعوا صوت طلقات رصاص بشكل هستيري
طبعا الكل اتفاجئ بالصوت المفزع ده والكل بيسأل
هو فيه ايه ؟؟؟ ايه اللي حصل ؟؟؟
وشوية ولقوا طلبة مدرسة ثانوية خرجوا من المدرسة
وبيجروا في حالة رعب وغضب شديد جدا
ونزلوا تكسير في السيارات اللي واقفة في الشارع
وبدأوا يحدفوا طوب في كل اتجاة
طبعا معظم موظفين الشركة نزلوا يشوفوا سياراتهم
ويعرفوا سبب اللي بيحصل ده !!!

تفتكروا عرفوا أيه؟؟؟؟
النهاردة كان الحكم في قضية أرض (مدينتي )
والباشوات كسبوا القضية
فإبتهاجا بالنصر العظيم ده
بدأوا بإطلاق أعيرة نارية في الهوا
ماتقولوش فرح ابن العمدة !!!!
كانت النتيجة ان طلبة المدرسة الثانوية سمعوا صوت الرصاص
افتكروا ان فيه بلطجية وإعتداءات في المنطقة
وعملوا اللي عملوه بدون تفكير
بذمتكم ده تصرف وكلام يرضي ربنا ؟؟؟
لما الكبار يعملوا كده في الظروف اللي احنا فيها دي
وحالة البلد الغير مستقرة حاليا
نلوم الشباب على إندفاعهم وحماسهم ليه ؟؟؟
والله انا اكيد حيحصل لي حاجة من اللي بشوفه وبسمعه
ابقوا اقروا على روحي الفاتحة بقى.