أنا مش من هواه المقادير بصراحة
بس التشيز كيك دي جامدة آخر حاجة
بسيطة جدا من اختراعي

الاحتياجات
جبنة كيري
حليب مكثف محلي أي نوع
بسكويت والاحسن اللي هو بالزبدة
شوية زبدة سايحة او الاحلي سمنة سايحة
سويس رول من مونجيني اللي بيتباع في السوبر ماركت
او عند البقال حتي .. انا فضلت اللي بالفراولة

بلا كبة بلا عجانة بلا صينية تشيز كيك
مدة التحضير ربع ساعة
بصوا بقي واحدة واحدة معايا

(1)
الأول نحط كيري وحليب مكثف محلي
بنسبة 6 كيري مثلا لـمقدار حباية كيري حليب
او ممكن طبعا النسبة تتغير حسب المذاق
نخلطهم مع بعض انشالله بشوكة زي مانا عملت
وتحطيها في التلاجة وتكملي

(2)
نطحن البسكويت من غير كبة انا حطيته في كيس
وبالشاكووووووووووش
ايون هو الشاكوش اللي بتتخانقي بيه في البيت
و طك طك طك طك اتفرفت البسكوت

(3)
ادلقيه في طبق وحطي عليه السمنة او الزبدة السايحة
وقلبي كويس جدا وبعدين قسميه علي الاطباق او الكوبايات

(4)
طلعي الكيري والحليب المتقلبين في بعض
وحطيه علي البسكويت وبعدين قطعي السويس رول
او الكيك ترانشات وخدي شريحة واحدة فوق الجبنة
بحيث انها تبقي طبقة واحدة فوق الجبنة

(5)
خلاص كده
خلصنا؟
اه خلصنا .. فيه ايه؟
متأكدة؟
ايوه فيه ايه المشكلة؟
عايزة تزيني بقي زيني بفراولاية ولا حاجة

واللي تجربها ويطلع طعمها مش تشيز كيك
يجي يقولي عشان هنفذله طلب يطلبه مني

بصراحة تحفة
توتي عملت إختراعها بحرفية شديدة جدا
والنتيجة طلعت

شكرا يا توتي حبيبة قلبي
قربي شوية حبيبتي

يخرب بيت اللى يزعلك يا توتى
شاكوش
لا و الوصف نازل كده ولا ف الاحلام
على طريقة ادلقى و ازلطى
هههههههههههههههههههههه
و الله يا توتى انا جربت التشيز كيك على كل شكل و لون
و ف الفرن و ع البارد
بس بامانة موردتش عليا الطريقة دى
لا فيه جلاتين ولا لبن بودرة ولا جيلي ولا فيلينج
حاجة كده اشى خيال يا ناس
بس بما ان فيه حد جرب و داق و حكم بالامتياز
يبقى احجز واحد انديفيدوال لو سمحتى
و طبعا اسمحى لى حضرتك بابداء اعجابى و تقديرى لفكرتك انك تنزلى الصور من مطبخك و على طريقتك
بس نقول يا رب تنزل
انا بقى ليا مداخلة - اسمحى لى عادة بقى
اجمل طعم دقته للتشيز بجد و لكل الحلويات اللى بالجبنة
باعملها بالجبنة القريش
تحفة بجد
و لونها بعد الضرب ولا الكريمة
بس نزود لها فانيليا و لبن بودرة
نلاقى الطعم حكاية
و بتبقى صحية و عشان الناس اللى بتعمل دايت
تسلم ايديكى يا قمراية
و بانتظار افتكاسات سهلة و لذيذة كده

ميرسي يا دودي علي شهادتك للتشيز كيك بتاعتي
انا مبسوطة انها عجبتك .. والجميل انها سهلة
وتحضيرها سريع جدا يعني تنفع في وقت الزنقة

ههههههههههههههههه
دوللي ضحكتيني بجد
اهي دودي داقت وحكمت
جربيها وابقي قوليلي رأيك
وشكرا علي الاضافة يا جميلة