مش كُل من قال دين
الناس تقولّه آمين
ولا كُل من تبّت
أقدامه تتثبّت
دى الأرض عارفة الناس
يا أهبل يا متفاخر
الكُل فى الآخر
للأرض راح يرجع
دمع الحزين يشفع
جرح الفقير ينفع
لكن لمين تدفع؟
والأرض أصل المال؟
والناس عليها رمال
فاهمين أصول الدين
مزروع خشوع فى العين
وماتنتظرش فـ يوم
هايقولوا أى آمين

مش كل من قال دين
الناس تقولّه آمين
ولا كُل بايع باع
الناس تقولّه وداع
ولا كُل دمعة عين
الناس تقول آسفين
ولا شرط نتنفّس
علشان نكون عايشين
اسمع يا أبو الجاهلين
الشعب راح يخطُب
يؤمر
ولا يطلب
اسمع وركّزلى
الحق صوت أزَلى
والحُب لو جازلى
الفرح عرف الدار
اسمعنى يا محتار
من طولة المشوار
مشوارنا من طوله
سمع البشر قوله
من صدقه يصفوله
ملايين بشر سامعين
ولا شرط لو قال دين
الناس تقولّه آمين

يا معشر الأهوان
مساجين كما السجّان
دى الأرض للإنسان
والله و بشرفى
من حقى أشوف تَرَفى
وأسأل يا هل ترى فى؟
ولا ما أنش أوان!
اسم الأمير
زهران
لابس حرير
قفطان
لقب الأمير
إنسان
عايش على أرضه
صان البشر عرضه
حُب الحياة فَرضه
والناس بيعترضوا
لو حد يخدعهم
تاجر فى أوجاعهم
شَط الوطن ساعهم
من مغربى لبَصرى
اسم الأمير
مصرى
لابس حرير
عصرى
لقب الأمير حَصرى
مايجوزش غيره أمير
ولا مرّة قال الدين
علشان نقولّه آمين