معلش

انا هابدأ الموضوع من آخره

و هابدأ بالصور

تعالوا نشوف





























شوفتوا الصور

تعالوا بقى نعرف ايه اللى بيحصل دلوقتى عند ماسبيرو ؟!

النهاردة يا جماعة يوم بعيد عن ايام الجمعة اللى اتخنقنا منها

بس النهاردة مكانش بعيد عن الغضب

لان اليوم كان

"يوم الغضب لاقباط مصر"

غضب من ايه؟

غضب من احداث المريناب اللى كلنا سمعناه

و للى مسمعش

المريناب دى قرية صغيرة بأسوان

مكانش فيها كنيسة للمسيحيين

فقام واحد مسيحى حول مضيفته لكنيسة

و بعد سنيين كتيييير

قرر المسيحيين يعلوا الكنيسة بتاعتهم دى كمان 4 متر

قامت الدنيا و مقعدتش

و المحافظ الهمام قرر الهدم لان التصاريح اللى طلعت بيها الكنيسة دى كانت مزورة

و اداها تصريحات سخنت الناس

اللى طلعوا بعد صلاة الجمعة على طول

عشان ايه؟

عشان يهدوا الكنيسة

و هدوها بقى؟

اه

هدوها

و حرقوها

و حرقوا معاها كام بيت فى البلد

مين بقى اللى حرقوا؟

بيقولوا المسلمين!!!!!!!!!!!

طبعا بعد ده كله

الدنيا اتقلبت تانى

من جهة الاقباط

و بتوع المهجر ادوها هما كمان تسخين

و هاتك يا مظاهرات

و الجيش يفرق

و اعتصامات

و الجيش يفضها

و طبعا فيه مصابين

و دماء سالت

و تسخين

حتى من رجال الدين المسيحى

لحد ما تم الاعلان عن انه هيتنظم يوم للغضب بتاريخ 9 اكتوبر

لكل اقباط مصر

من اسكندرية لاسوان

و الكل هيشارك

و اولهم

رجال الدين المسيحى

و قد كان

خرجت المظاهرات النهاردة من بدرى

و باعداد كبيرة

حاملين لافتات

مرددين

"سلمية.. سلمية"

ده كان مشهد لبعض المتظاهرين

مشهد تانى

اقباط و باعداد كبيرة

حاملين مش لافتات

لا

حاملين اكفانهم

بعدها قطعوا الطريق اما ماسبيرو تماما

مشهد اخر

فى اسكندرية

نفس الترتيبات

و قطع الطريق بنفس الشكل

طيب الجيش بقى يعمل ايه؟

فى حالة قطع الطريق

بيبدأ الجيش بتفريق المتظاهرين كالعادة

و ده حصل مع الاقباط اكتر من مرة

و مع بتوع التحرير و ادام اكاديمية الشرطة

عادى

بس رد الفعل اللى مكانش عادى

الاقباط ردوا على الجيش اولا بالحجارة

و بعدين حصلت اشتباكات

و فجأة

انشقت الارض عن شباب جايين من شبرا

معاهم زجاجات ملوتوف و اسلحة نارية و سلاح ابيض

و هاجموا بيها الجيش

و سالت انهار الدماء

الخبر وصل لاخواننا اياهم "بتوع التحرير" ان الجيش بيضرب فى المسيحيين

فقاموا واخدين بعض على بعض - مسلمين و مسيحيين - و قرروا يروحوا يشوفوا فيه ايه عند ماسبيرو

بس الشرطة العسكرية كانت قافلة كوبرى اكتوبر

و منعوهم من الوصول و فرقوهم

قاموا واخدين بعض و جاريين على التحرير هاتفين "يسقط يسقط حكم العسكر"

فى الوقت ده طلعت مسيرة تانية للاقباط

و اللى حصل انهم فجأة لقوا الحجارة نازلة زى المطر على دماغهم

و كمان كان فيه ضرب نار من مجهولين فى الهواء

النتيجة و المحصلة بقى كانت ايه حتى الان؟

اقولك حاجة حلوة علشان بصراحة
فى دعاء بيقول اللهم اضرب الظالمين بالظالمين
والشرطة العسكرية تستاهل الضرب بالجزمة مش بالطوب
لأنهم بيعملوا فى الناس اكتر م اللى كان الأمن المركزى بيعمله
وعندى فيديوهات تعذيب..
أما بالنسبة للمضيفه بتاعت المسيحين فهما اخدوا ترخيص بانها تبقى بارتفاع 9 امتار
راحوا الناس عملوها زيادة
المسلمين خاطبوا المجلس المحلى والناس المسؤلين مفيش حد اتحرك
لأنهم خايفين طبعا
راح المسلمين بعد صلاة الجمعة اتفقوا انهم يهدوا الارتفاع الزايد
مش يهدوا المضيفه
وقف لهم ناس كتير منهم مسلمين
وكل اللى اتحرق
هى الغرفة بتاعت المقاول
والكلام من صديق من اسوان نفسها

حرائق و تدمير و خسائر فى المنشآت سواء عربات الجيش او مبنى التليفزيون او مبنى جريدة الاهرام

و الاهم الخسائر اللى فى الارواح

وزارة الصحة اعلنت انه المصابين عددهم 156 و الوفيات عددها 19 - منهم اتنين من المجندين بالجيش

و الوفيات فى تصاعد مستمر

طيب المحصلة بقى كانت ايه؟

لا شئ

سوى المزيد من الاحتقان الطائفى و السياسى

بس انا شايفة ان اللى لازم يلام فى احداث النهاردة هم رجال الدين المسيحى

ازاى اتحملوا المشاركة بمكانتهم الدينية فى كل العنف ده؟

ازاى قدروا يقفوا فى وش رجال الجيش و يرجعوهم للخلف فى مشهد مخزى ظهر فى شاشات التليفزيون؟

مش هاقول لكل من شارك فى جريمة اليوم سوى كلمة واحدة

حرااااااااااااااااام عليكم

و منكم لله

اسمحلى اختلف معاك يا احمد

مش الشرطة العسكرية اللى تستاهل الضرب بالجزم

اللى يستاهلها هما الناس اللى بتطاردهم الشرطة العسكرية نفسهم

و ايا كانت الفيديوهات اللى على اليوتيوب

اى واحد مجرم لازم ياخد جزاؤه

و المجرم مقصدش بيه اللى بيسرق ولا بيقتل الانفس

لا

ده بقى اللى بيسرق فرحتنا و بيقتل احلامنا بالبطئ

كل اللى بيعطل البلد و بيبلطج و بيساهم فى انهيار اقتصادنا و سرعة افلاس مصر يبقى مجرم

و انا و الله لو تطوله ايديا

كنت ولعت فيه بجاز

و بالنسبة للمضيفة او الكنيسة

ايه المشكلة لما تبقى 9 ولا 13ولا 100 متر حتى؟

ايه اللى يضايقنى كمسلم فى حاجة زى كده؟

"لكم دينكم و لى دينى"

و بعدين اللى حصل من المسلمين يوم الجمعة ده اكبر خطأ

كده بقينا عصابة

و وقت الصلاة بتاعنا بقى للتخطيط لتدمير المسيحيين

مش ده اللى هييجى ف دماغ المسيحيين؟

و اسمحلى يا احمد

انا مشوفتش من اللى حصل فى الكنيسة غير الفيديو الطويل اللى على اليوتيوب

و افتكر انه باين فيه كويس ايه اللى اتحرق بالظبط

شاكرة مرورك الثرى

و سعيدة بمناقشاتك الواعية

هو انا يعنى عاوزها تبقى وحشة يا دوللى .. ماهو انا نفسى انا كمان اولع فيهم بجاز .. ولا غاز اسرع .
بس على فكرة حكاية انهم يبنوا بمزاجهم دى لأ طبعا ازاى ده
هو مش فى تصاريح وحاجات ولا هى فوضى
طبعا رد الفعل من امام المسجد والمسلمين كان غلط لأنها مش بالعافية ومش بلطجة ..
بس بردو الموضوع مش مستاهل اللى حصل ده كلو م المسيحين ..
ومش كل حاجة هيطلعوا عليها مظاهرة
لانهم عارفين انهم غلطانين فكانوا يسكتوا وخلاص
وصدقينى الحرائق دى حصلت بعد المظاهرات
وكانت كل حاجة هتتفض وخلاص

وانا اللى بشكرك على الخبر وطبعا حضرتك اكيد بردو تفهمى اكتر منى فى الموضوع ده :)

بس كده
غالى و الغاز برضه غالى
بس انتى انوى و اتكل
و الولاعة علينا يا عم الحاج
هاختلف معاك لتانى مرة فى حكاية يبنوا بمزاجهم دى
لان الكل بيبنى بمزاجه
و مش جوامع تحت البيوت و بس
لا دى بيوت كاملة مش ادوار و بس
و بعد كده ايه اللى بيحصل
غرامة و صلح مع الحى او المحافظة - ده بالنسبة للبيوت يعنى - و خلاص
طيب لو جوامع
برضه غرامة و خلاص - ده لو حد يعنى بلغ او مهندس الحى كان حابب انه ياخد الاتاوة المعتادة
و بعدين معلش يعنى
انا شفت البيوت اللى قامت اثناء الثورة و الجيش مشكور هدها
عارف الناس اد ايه كانت خبيثة عشان ميتمش الهدد
عملوا ايه؟
بنوا جوامع كملحق للبيوت دى
مبنى من الطوب الاحمر بمئذنة
يقوم الجيش يهدم البيت و يطربقه فوقانى تحتانى
و يسيب الجامع اللى هو بيت من بيوت الله
طيب لما المسيحى يشوف ده بيتعمل مع المسلمين
بالله عليك لو انت مكانه هتعمل ايه؟
و شوف كمان
الاهالى - لا الحى ولا المحافظة - هما اللى قرروا يزيلوا
مش الدور المخالف و بس
لا و سبع قبب و علامات الصليب من الكنيسة
طيب ليه؟
عشان بتؤذى مشاعرهم!!!!!!!!!!!!!!
فيقوموا يهدوا المضيفة و يحرقوها
طيب ليه؟
مش ده كده يبقى استفزاز
كلامى ده مش معناه انى موافقة على اللى حصل فى ماسبيرو
لانى شايفة انه ملوش اى علاقة باللى حصل فى المريناب - ده حتى رجال الدين و الاقباط هناك تنكروا و رفضوا اللى حصل
انا بس كنت مع حق التظاهر السلمى اللى كان لحد الساعة 6
من غير قطع طريق
ولا قذف بالحجارة و المولوتوف
ولا حرق
ولا قتل - ودى الكلمة المناسبة فعلا
شاكرة مرورك و سعيدة جدا بمناقشاتك يا احمد

أنا اعصابي باظت بجد
بس بحاول اتماسك عشان دودي
بدأت تتعب وقلبها مش مستحمل اصلا

أحمد احنا اللي كبرنا موضوع المضيفة
مش المسيحيين .. زي ما دوللي قالت
احنا جنب البيت عندنا الناس بتبني فلل
وعمارات واللي عايز يعلي بيعلي
واللي عايز يهد ويبني من اول وجديد بيعملها
ومحدش اتكلم ولا قال اي حاجة يعني
اشمعني لما هم حبوا يعلوا دور اتحمقنا قوي
وقعدنا نقول قانوني ومش قانوني

زائد ان مش من حق حد يهد اي حاجة غير الحي
او المحافظة او ايا كانت الجهة المسؤولة عن الموضوع ده
غير كده ولا الأهالي ولا الجن الأزرق من حقه يلمس طوبة
من أي حاجة اتبنت او عليت او حصل فيها اي تغيير
فما بالك بحاجة تستخدم كدار عبادة حتي لو اوضة
لازم تحترم ويحترم قدسيتها ومكانتها ودورها

وزي ما احنا من حقنا نطلع في مظاهرات ومسيرات
كل يوم جمعة لغاية ما بقت حاجة تقرف يعني
هم كمان من حقهم يطلعوا ويطالبوا بحقهم
اشمعني أول ما هم عملوا أول مسيرة
بدأنا نعترض ونقول كفاية ومش وقته

كمان جينا ولمنا رجال الدين المسيحيين
ونااااااادرا ما بنجيب سيرة رجال الدين المسلمين
رغم ان معظمهم يا اخوان يا سلفيين
يعني صباح التشدد والتعصب والارهاب

مش عارفة بصراحة اكتب الكلام بيطلع مني بالعافية
بس فيه كلام كتير قوي جوايا عايز ينفجر
بيخبط في دماغي وعايز يتحرر مش عارفة ازاي

كلامك كله مظبوط و عين العقل يا توتى

انا عن نفسي برفض استخدام اى رجل دين - مسلم او مسيحى او يهودى كان - لمكانته فى اى مناسبة او مكان غير اللى هو وطَن نفسه ليه

رجال الدين المسيحى هنا اللى نزلوا فى المظاهرات دى و الزى بتاعهم اتلطخ بالدم مسؤلين ادام ربنا عن دم الناس اللى ماتوا دول

و زيهم برضه شيخ الجامع اللى كان ف المريناب وقت صلاة الجمعة المشؤمة

هو كمان عليه لوم كبير فى الاحداث اللى حصلت

لانه كان واجب عليه انه يهدى الناس و يذكرهم بحقوق أهل الذمة

مش يزود البنزين على النار

عارفة يا توتى مين اكتر واحد بكرهه حاليا من مرشحين الرئاسة و باتمنى من الكل قلبى انه مياخدش الا اصوات عيلته وبس

تخيلى

الدكتور سليم العوا

من اكتر الناس نفاقا

و كان السبب فى فتن و ازمات كتير حصلت بين المسلمين و المسيحيين

و فجأة بعد ترشحه للرئاسة

بقى ماشي مع التيار

و المسيحيين على راسه من فوق

و لا مانع ان النائب بتاعه يكون مسيحي

وكلام مناقض لكلامه اللى كان قبل كده عن وجوب اخراج المسيحيين من مصر

رجال الدين عامة

لو كل واحد اتفرغ لدوره كرجل دين

ينشر اوامر الله بالحق

و يخاف على مصلحة البلد بجد

كان الحال كله اتغير

شاكرة مروركم و مناقشاتكم الجميلة بجد