التحرير.. التحرير.. التحرير
اسمحولى بعد اذنكم اغير الاسم
و معنتش هاكتب عنه الا كده
لحين اشعار اخر
"ميدان التدميييييييييييييير.. التدميييييييييييييير.. التدميييييييييييييير"
تدمير و خراب للبلد بميدان التدمير
ف يومين 10 فتلى و ما يقارب الالف مصاب ف التدمير و بس
تدمير لشعورنا بالامان
من بلطجية الميدان وبلطجية السياسة
تدمير لاحلامنا فى الاستقرار
بشبح تاجيل الانتخابات
الله لا يسامحهم اللى حولوا الميدان رمز التحضر و التحرر
لبؤرة البلطجة و الاجرام و التدمير
و حسبى الله و نعم الوكيل

لا حول ولاقوة الا بالله العلى العظيم
والله يادوللي مابقتش عارفة الصح من الغلط
خلاص فقدت كل امل واصبح الإكتئاب صديقى ورفيقي
اينما ذهبت وكلما فكرت
ربنا يهونها بكرمه ورحمته.

الناس دى مش عارف عايزين ايه بالظبط
احنا ما صدقنا المجلس العسكرى عمل حاجة صح
الانتخابات خلاص كمان اسبوع
وهما زى ما يكونوا بيدوا حجة للمجلس انه يأجل الانتخابات
حرام والله اللى بيحصل فى البلد دلوقتى ده
الناس بقت بتخاف تخرج من بيوتها علشان اللى بيحصل ده
شكرا يا دوللى على الموضوع
وهو فعلا دلوقتى اصبح اسمه زى مانتى قولتيه كده

اشد لحظات الليل اظلاما هي التي تسبق الفجر مباشرة...

بجد انا متفائل ... حاسس ان فيه خير كتير جاي ان شاء الله في الايام الجاية :)

والله يا ميدو لسه مش متأكده
من شوية اعلنوا قبول استقالة حكومة شرف
طيب وبعدين ؟؟؟
مين بقى اللي حيمسك البلد في الشهور اللي جاية دي ؟؟؟
ولا حتبقى من غير حكومة ولا ايه بالظبط؟؟؟
ميدان التحرير مليان على اخره دلوقتي
وشارع محمد محمود مولع نار وقنابل مسيلة للدموع
وغازات اعصاب والحالة ماتسرش
والمصابين تعدوا الـ 1000 بكتير غير عدد القتلى فوق 33 شهيد
صحيح مش عارفة شهيد ولا قتيل لكن مش فارقة
اهي ارواح ربنا خلقها وماتت بطرق بشعة
سواء من البلطجية ولا الشرطة الله اعلم
ربنا يستر.

والله احسن حل للناس دى
ان المجلس العسكرى يعمل حظر تجول لو لمدة ساعة واحدة فى الليل
واللى يتواجد فى الميدان يتقبض عليه او يتقتل حتى
لأنه بيخالف القانون
هو رأيي الشخصى علشان حرام اللى بيحصل ده ..

البلد دى بقت الفوضى سيمتها
اساسا الناس اللى واقفين مختلفين فى مطالبهم
يعنى بتوع الحركات و الائتلافات عاوزين الحكومة تستقيل
و المجلس يسلم السلطة قبل 30 ابريل
(طيب انتوا اعلنتوا ده ما تخفوا بقى فى ستين داهية ولا هتعتصموا لحد تلاتين ابريل؟)
المصيبة بقى لما مراسل البى بى سي سالهم طيب مين ييجى مكان عصام شرف
قالوا لسه متفقناش
يمشي الاول و بعدين نشوف
تمام زى ما قالوا ايام مبارك
و بتوع الاحزاب دول فى موال تانى
اجتمعوا و طلعوا بيان مع نفسهم كده انهم بيطالبوا باستقالة وزير الاعلام و الداخلية و رفض لوثيقة السلمى
و بعدها بقى راحوا طالعين ع التحرير عشان يعلنوا بيانهم
قاموا العيال اللى هناك دول طاردينهم (كانه بيت ابوهم)
و بعدين تلاقى بقى ناس تانيين كده متعرفلهمش ملة ولا دين عاوزين المشير يرحل
و يسقط النظام
و مديينها حروب شوارع مع بتوع الداخلية و الامن
ة تكسير و حرق ف كل حاجة حواليهم
اللى بيحصل بقى ف التدمير ده
مسمع ف كل المحافظات
يعنى هنا ف المنصورة
المظاهرات بقالها تلات ايام شغالة
و محاصرة لمديرية الامن (ليه مش فاهمه بجد)
و لما الراجل حاول يتفاهم معاهم
اتهجموا عليه
و حاولوا يقتحموا المديرية
فضرب النار اشتغل
و قنابل مسيلة للدموع دخانها كان واصل لحد البيت هنا
فوضى و همجية و قلة ادب
و على فكرة
لو مكانش ده حصل دلوقتى
كانت هتحصل مصيبة اكبر
لان الانبا فلوباتير لسه من اربع ايام مديها تصريحات زى النااااااااار
عن انهم مش هيسكتوا عن اللى حصل يوم الثلاثاء ف شبرا
يعنى لو الجيش قفلها ف حارة
هتتفتحله فى ميدان
و الاعلام بقى مقولكوش على العناوين اياها
"الفراعنه ضد خير اجناد الارض"
"شعب السبع الاف سنة حضارة ضد رابع اقوى جيش بالعالم"
و تسخين على ودنه
ها يا ميدوا
لسه بكرة برضه احلى؟
ربنا يستر و يحميكى يا بلادى