من شهر كده
و بعد زيارة مفاجئة للست هيلارى كلينتون لليبيا
تانى يوم على طول
لقينا ما يلقبون بثوار ليبيا يعلنوا القاء القبض على القذافى وولده المعتصم
بعدها بساعة اعلنوا وفاة القذافى
بعدها بساعات شوفنا الكليب المهين اللى وضح تعذيبهم للقذافى
و عرفنا بعدها انهم سحلوه بسيارة و قتلوه
و فى اعلان مثير للاشمئزاز اعلن احدهم انه تم اغتصابه
و بعدها عرضوا جثته بالمشرحة بالسوق و جثة ولده للفرجة و التصوير
فى مشهد مهين لكل الاعراف و الاديان
البعض اداهم العذر
و قال من حرقة قلبهم و قهرتهم وكده
و انه ده مش هيتكرر تانى لما يقبضوا على اى من اعوانه او ابنائه
حتى تم القبض اول امس على سيف الاسلام بجنوب ليبيا
الصور الاولى له اظهرت يده اليمنى و بها اصابات واضحة
اعلن بعدها احدهم ان الثوار قطعوا اصابع يده اليمنى (الوسطى و السبابة و الابهام) اللى كان بيشير لهم بيها للتهديد
سيف الاسلام - بنوع من الخجل يمكن - اعلن انه الاصابات من غارة للناتو
بس بوقاحة اكد الثوار دول فعلتهم تانى
متغافلين لحرمة المساس بالاسير
زى ما تغافلوا حرمة الميت من قبل
بس صدقوا فى كلامهم انهم مش هيعملوا فيه زى ما عملوا فى ابوه
لانهم مرتبين لامر كل فرد بالنظام السابق على ما يبدوا
بالامس اعلنوا عن اعتقال عبد الله السنوسى رئيس الاستخبارات السابق
و لسه الكل مترقب
و عاوزين نعرف بسرعة
هما هيقطعوا له ايه؟

وضع ثوار ليبيا غير وضع اى ثوار فى العالم
يعنى عند الاختلاف بين الناس المحترمين
تلاقيهم يعلنوا حالة الخلاف
يعتصموا
يتخانقوا
يشتموا بعض
كبيرهم يعنى رجوح سطحية
انما ليبيا تختلف عن الاخرون
دول لما بيختلفوا
بيدوها وش رشاش على ار بي جيه
و قتل على طول يا عم الحاج
مفيش وقت ولا فلوس لعلاج و مستشفى
و الجثث ف البحر او ف الشارع
هما لسه هيدفنوهم
ده حصل وقت ثورتهم لما اغتالوا وزير الداخلية المنشق السابق هو و اعوانه بحركة غدر و ندالة منقطعة النظير
و حصل بعد ثورتهم لما اختلفوا على وضع سوق ف ميدان!!!!!!!!!!!!!
اه و الله يحطوه هنا ولا هناك
فراحوا قاتلين بعض على طول
خيبة ووكسه و ضربة قوية من الغرب بجد
عشان كده
بجد الناس دى تستاهل لقب ثوار و بجدارة
بس على الطريقة القذافية
ثوار نسبة الى ابناء الثور

ههههههههههههههههههههه
مافيش فايدة فيكي يادوللي
لازم آخر كلامك يقلب الموضوع النكد لهزار
ههههههههههههههههههه
طبعا انا مش موافقة على اللي حصل ده كله
من اول ثورتهم لحد دلوقتي
الليبيين طول عمرهم مرتاحين جدا ماديا
والحكم فعلا في ايديهم بنظام اللجان الثورية
بصراحة مش فاهمة ده حصل ليه ؟؟
لكن اهو حصل وخلاص
لكن قتل الأسري والتمثيل بيهم دى غلطة لا تغتفر ابدا
لا دين ولا شريعة ولا انسانية تقول كده
لكن نقول ايه بقى ؟؟
(الله غالب)..دي كلمة ليبية.