لما تكون عارف إنك غلط

د. هبة يس

ارسلت (....) الي افتح قلبك تقول:
انا بنت حديثه التخرج، كنت في الكليه علاقتي محدوده جدا بالجنس الاخر، لكن في اخر سنه كنت مشتركه في نشاط مع مجموعه كبيره من اصحابي، اتعرفت من خلاله علي شباب كانوا في المجموعه بتاعتي، لكن العلاقه لم تكن اكتر من تعارف سريع وخلاص، بعد فتره لقيت واحد من المجموعه بيراسلني علي الايميل، رديت عليه واتكلمنا عادي، كنا بنتكلم كتير جدا عن حاجات عامه، والي كان مطمني انه كان مرتبطا وكان دايما بيحكي عن البنت الي بيحبها، وكمان كنت عارفه من البدايه ان دماغه غير دماغي خالص، وان احنا مش ممكن يكون في بيننا توافق في يوم من الايام، عشان كده مكنتش خايفه من الكلام معاه، وكنت دائما باقول لنفسي انه مش من النوع الي ممكن احبه ابدا.

لكن وبالرغم من كده لقيتني بتعلق بيه، وبحب كلامنا مع بعض، كان بيفهمني بسرعه جدا، وساعات من غير ما اتكلم كان بيعرف انا عايزه اقول ايه، وكنت دائما باقول ان التعلق ده مجرد صداقه او فضفضه مش اكتر من كده، خاصه واني كنت بحس انه شخصية غريبه، له تصرفات كتير مش مفهومه بالنسبه لي، لدرجه اني شكيت في اوقات انه ممكن يكون مريضا نفسيا.

بعد التخرج انقطعت ايميلاتنا سنتين، وافتكرت ان الموضوع انتهي علي كده، لكني فوجئت بيه بيبعتلي تاني، وبيتكلم معايا من جديد بعد كل المده دي، عرفت انه ساب حبيبته لانه اتقدم لاهلها ورفضوه لاسباب ماديه، ورجعنا نتكلم مع بعض كتير زي زمان، وبعد فتره بسيطه لقيته بيقولي انه معجب بيا، وان احنا لازم نتقابل ونشوف بعض، رفضت وصديته جدا في البدايه، كنت عايزه اقوله ان سكتنا مش واحده، انت تفكير وانا تفكير تاني خالص، اصر والح بشكل حاصرني بيه، وافقت، وفضلنا نلعب مع بعض لعبه القط والفار لمده 5 اشهر، لغايه ما لقيت نفسي باقوله اني انا كمان اتعلقت بيه وعايزه افضل معاه.

المشكله اني شبه متاكده انه شخص مش طبيعي، مش عارفه ممكن يكون مريضاً نفسيا؟، ولا شخص غريب الاطوار؟ ولا ايه بالضبط؟...هاحكي لحضرتك تصرفاته عشان تساعديني في الحكم عليه.. انا حاسه انه غير قادر علي التعامل مع الناس بشكل طبيعي، يعني مثلا يكون موجود ومتواصل وكله تمام، وفجاه يختفي تماما لمده شهر، يقفل موبايله ومايردش علي ايميلات او فيس بوك، ومحدش يعرف يوصل له باي طريقه، وفجاه برضه يظهر تاني ويتعامل عادي وكان مفيش حاجه حصلت!!، الموقف ده حصل اكتر من مره، طبعا تضايقت جدا وكلمته كتير، لقيته بيقول لي ان الاختفاء ده لا يعني انه بيبعد عني او مش عايزني، هو بس بيكون حاسس انه عايز يكون لوحده، والي زاد وغطي انه قبل كده كان بيظهر شهر ويختفي شهر، لكن دلوقتي بقي ممكن يظهر اسبوع ويختفي بقيه الشهر.. حاجه تبرجل بجد.

في خلال الفتره الي فاتت كان تواصلنا الرئيسي عن طريق النت، وكانت مقابلاتنا او تليفوناتنا نادره جدا، لاني كنت عايزه احترم نفسي واعززها قدر الامكان، والموضوع ده كان مضايقه جدا، وكان ساعات بيحاول يغيظني عشان اوافق اقابله، فيقولي انه هايقابل بنات تانيين عشان انا مش راضيه اقابله، ده غير انه كان معظم الوقت مكتئب وحزين، وبيزعل من حاجات بسيطه وتافهه جدا، وصعب ارضاءه جدا، من الاخر شخصيه معقده ومتعبه الي ابعد الحدود، عشان كده انا قررت اخيراً بعد تفكير طويل اني احذفه من النت عندي، واني مش هاتصل بيه تاني، هو حاليا في فتره الاختفاء المعتاده بتاعته ولسه معرفش اني حذفته، وخايفه جدا لما يعرف يرجع يكلمني تاني ويلح عليا تاني، وانا احن له واضعف وارجع له.

انا زعلانه من نفسي اوي لاني حاولت اصلح منه كتير، وكنت قابله اننا نكمل مع بعض بكل عيوبه ومشاكله دي، وكنت ماشيه في الطريق وانا عارفه ومتاكده ان احنا مختلفين تماما.. ازاي؟ مش عارفه؟، كمان في حاجه تانيه عايزه اعرفها، هو ليه كان مصر علي علاقتنا وعلي اننا نكمل مع بعض، وعاوز اننا نتقابل ونشوف بعض طالما انا مش مريحاه ومش محققه له الي هو عايزه ؟، كان هدفه ايه؟.. برضه مش عارفه؟، انا بعتلك يا دكتوره الحكايه باختصار عشان اعرف رايك وتحليلك للموقف بعد ما تعبت وزهقت من كتر التفكير والاسئله.

هاتستغربي لو قلت لك انك مثال حي لالاف البنات والشباب الي في سنك دلوقتي، الي بيختاروا غلط، وعارفين انهم غلط، وبرضه مكملين، ومصرين يفضلوا مغمضين عنيهم لغايه ما يخبطوا في اول حائط، فيفركشوا ويبعدوا _وده العادي_ والغريب انك تلاقيهم بيتالموا ويتعذبوا ويتعقدوا في حياتهم!!...طب ليه؟ ما احنا عارفين من الاول ان احنا كنا غلط، هو احنا نكدب الكدبه ونصدقها؟...

خلينا نبدا الموضوع من البدايه، من كام اسبوع كتبت موضوع اسمه (كيف اعرف انه هو؟)، شرحت فيه ازاي الواحد يتاكد انه اختار الشخص الصح، والانسان المناسب ليه عشان يكمل معاه حياته، وده لينك الموضوع لمن يحب قراءته:

(افتح قلبك مع د. هبه يس).... كيف اعرف انه هو؟

والواحد ممكن يختار غلط باكتر من طريقه، فممكن تلاقي نفسك واحد من دول:

1) تكون ماشي في حياتك لا بيك ولا عليك،
وتلاقي الي يقولك (معجب بيك) او (بحبك)، فتقوله بمنتهي التلقائيه (وانا كمان)، وانت لا بتحبه ولا حاسس بيه اصلا.

2) او تكون قاعد فاضي،
وتقابل في حياتك واحد فاضي برضه، فيطلع في دماغك انكم تونسوا بعض بدل القاعده، فتقرروا تبقوا مع بعض لا لشيء الا انكم مش لاقيين غير بعض.

3) او تقابل واحد تبقي عارف ومتاكد من البدايه انه مش ماشي مع شخصيتك،
ولا دماغه راكبه مع دماغك _زي ما حصل مع صاحبتنا_ لكن برضه تقنع نفسك بسذاجه انك ها تقدر تغير منه، او تغير من نفسك عشان تمشوا مع بعض.

4) او تقابل شخصيه (مكلكعه) او مريضه او عندها مشاكل من اي نوع،
فتصعب عليك، وتحب انت تعيش دور (المنقذ) والبطل المضحي صانع المعجزات، الي هايقبل بالشخص ده بكل مشاكله، وهايصلح فيه، وهايعمل منه انسان جديد لا قبله ولا بعده، وده برضه حصل مع صاحبتنا.

تعددت الطرق والغلط واحد،
وهو انك بتقرر بكامل ارادتك انك تتغافل عن كل المشاكل والسلبيات والتناقضات الي في الشخص او في العلاقه وتكمل، وانت معتقد انك ممكن تنجح، او ممكن يجد في الامور امور وتلاقي الدنيا مشيت لوحدها، فتكون المفاجاه _المتوقعه_ ان الموضوع يبوظ، وتلاقي نفسك استنزفت، ضاع وقتك وعمرك، واستهلكت عواطفك ومشاعرك، وجرحت قلبك وعلمت عليه، عشان كده لو حضرتك واحد من الحالات الي فاتت دي، ولسه في نص الطريق باقولكهالك اهو بمنتهي الوضوح.. الحق نفسك ووقف دلوقتي قبل بكره، وبلاش تمشي في نفس الطريق لانك هاترجع تندم زي كل الي مشيوا فيه قبلك.

طب ليه الواحد بيعمل كده؟،
ليه بيقبل بحاجه زي كده طالما بيكون عارف انها غلط من البدايه؟، الاجابه ببساطه هي...الاحتياج، الواحد بيقبل باي حاجه بس لما يكون محتاج، ممكن ترضي باي لقمه لما تكون جعان، وممكن تلبس اي حاجه لما تكون بردان، هو كده بالضبط، والاحتياج ده نوعين:

1) احتياج عاطفي:
لما يكون الواحد محتاج حد يقوله كلمه حلوه، او لما تكون الواحده محتاجه نظره اعجاب، لما يكون محتاج حد يسال عليه وينشغل بيه، ولما تكون هي محتاجه لحد يقولها طمنيني عليكي وخلي بالك من نفسك، لما يكون الواحد محتاج يحس انه مهم عند حد، وانه فارق مع حد، وانه حلو وجذاب في عيون حد.

ده اسمه جوع عاطفي او بلفظ اشيك (فراغ) عاطفي،
وده موجود بوفره عند البنات، وبالذات لو البنت معندهاش ثقه كفاية في نفسها، فبتلاقيها بتتعلق باي واحد يقولها كلمه حلوه، عشان تقدر تستمد من وجوده اهميتها وثقتها بنفسها وتقديرها لذاتها.

2) الرغبه:
لما يكون الواحد نفسه يجرب القرب ولمسه الايد ووو...، لما تكون كل الافلام والمسلسلات كده، ولما يكونوا كل اصحابي كده، هاتيجي عليا انا بقي؟، انا كمان لازم يكون لي مغامراتي وتجربتي الي احكي عنها، او عالاقل احتفظ بيها لنفسي، وده بقي موجود بوفره عند الولاد، وخاصه لو كان وسط شله من اياهم الي بتعتبر العلاقات بالبنات هي تاشيره الدخول الي عالم الرجوله.

وعوده ليكي يا صديقتي،
انتي كنتي محتاجه، عشان كده غمضتي عنيكي، واخرستي صوت عقلك، ومشيتي في الطريق الي انتي عارفه انه مش هايكمل من الاول، ويمكن ربنا انقذك بحكايه ان الشخص ده له تصرفات غير طبيعيه واضحه، عشان تعيدي حساباتك وتفكري من اول وجديد، لكن بصرف النظر عن كونه هو مريض نفسي او لا، الموضوع ده محكوم عليه بالفشل، وانتي بنفسك علي يقين بانكم مختلفين، وانه مش هو ده الشخص المناسب، يبقي كان لازم تتوجعي عشان تفوقي وتصحصحي كده، وتاخدي الخطوه الي كان لازم تخديها من زمان، وهي انكم تسيبوا بعض، واعتقد بعد كل الي قلتهولك ده لا يمكن تسيبي نفسك تضعفي وتحني من جديد حتي لو هو ظهر من تاني وزن علي دماغك كعادته، مابني علي باطل فهو باطل يا حبيبتي، انهي الموضوع وكفايه اوي لحد كده.

اما عنه هو،
سالتي هو ليه كان متمسك بيكي وبيحاول معاكي؟، عشان نفس السبب، هو كمان محتاج، وعنده رغبه محتاج الي يشبعها له، سواء بشكل معنوي او مادي، هو شاف انك انتي الي ممكن تحققي له ده مع بعض الالحاح والمحاولات، كان في واحده قبلك ولما راحت دور في دفاتره القديمه فلقاكي، فكنتي انتي بالنسبه له اقرب هدف..بس.

الخلاصه انك لازم تقفلي الموضوع ده نهائيا،
واقلبي الصفحه دي من حياتك، واوعي تضعفي مهما حاول معاكي، وصلي له انه مفيش امل، وهاتلاقيه زهق وراح يحاول مع واحده تانيه، انتي لسه في بدايه حياتك، وشبابك ووقتك وعمرك اهم بكتير من انك تضيعيهم مع شخصيه زي دي، وياريت تفكري كويس في كل الكلام الي قلته ده، قبل ماتدخلي نفسك في اي علاقه بعد كده، ماتوافقيش علي ارتباط الا لو كنتي فعلا حاسه انه ينفع، وانك فعلا عايزاه بقلبك وعقلك.