أرسل (أ.م) يقول:
عمرى 23 سنة، طالب، وأعمل أثناء دراستى، الحكاية تتلخص فى إن اللى بحبها أكبر منى بخمس سنوات، يعنى هى عندها 28 سنة، وفى مشكلة تانية إنها مطلقة، الحاجات دى مش مشكلة بالنسبه لى أنا، لكن أنا عارف إنها مشكلة بالنسبة لأهلى، وأكيد مش هايوافقوا على ارتباطى بيها، فكرت نتجوز من غير علمهم، لكن هى اللى رفضت عشان مانعملش مشاكل مع أهلى مستقبلا، أقنعهم بيها إزاى؟

إلى (أ) أقول:
لازم تعرف إن رفض أهلك للموضوع ده شىء طبيعى ومبرر جدا، أولا لأنك لسه صغير سنا فعلا، ثانيا لأنها أكبر منك، ثالثا لأنه سبق لها الزواج، وأكيد أنت عارف إن مجتمعنا لم يتمكن بعد من (بلع) فكرة الارتباط بمطلقه دى حتى الآن، خاصة إذا كانت أكبر سنا.
لكن سيبك منهم دلوقتى وخليك مع نفسك كده فى الأول، هل أنت فاهم فعلا أنت مقبل على إيه؟, هل أنت مقتنع قلبا وقالبا بالارتباط ده؟، ممكن تفكر معايا فى كام حاجه كده قبل ما تقف أمام أهلك أو تعمل حاجة من وراهم؟ زى مثلا:

1) من المعروف جدا إن الست بيبان عليها السن أسرع من الراجل، دى حقيقة، لكن فى ستات بتكسر القاعده دى، فهل هى من النوع ده؟، ولا زيها زى أغلبية الستات المصريات اللى ممكن بعد سنتين جواز تبصلها تحس إنها أكبر من جوزها بعشر سنين؟، خلى بالك إن 5 سنين مش كتير أوى لكن مش قليلين، يعنى أنت عندك استعداد تفضل تحبها وما تقارنهاش بالى أصغر وأجمل منها من هنا ورايح؟.

2) كمان النضج العقلى للستات ساعات بيكون أسرع من الرجالة الى فى نفس السن، ده مش اتهام للرجالة والله، لكن ده شىء شائع إنك تلاقى زوجين من نفس العمر، لكن شكوى الزوجة دايما هى (ضحالة) تفكير جوزها بالنسبة لتفكيرها وتحملها للمسئولية أكتر منه، فهل أنت شخص مسئول وناضج كفاية أنك تغطى النقطه دى، عشان بعد كده هى ماتحسش انك صغير عليها؟.

3) كون إنها مطلقه ده أمر لا يد لها أو لنا فيه، فجايز جدا تكون هى الى كانت مظلومة، أوانها كانت جوازه غير متكافئة، أو أى سبب من الأسباب، لكن أنت متأكد إن التجربة دى ما لهاش آثار سلبية عليها ممكن تؤثر على طريقة تعاملها معاك بعد كده؟، يعنى جوزها عقدها أو كان بيعاملها بشكل مهين يخليها عفوا يعنى (تطلعه عليك) أو أى حاجه من الحاجات دى؟.

على فكره كون إنها مطلقه ده ممكن يكون ميزة، لأنها هاتكون فاهمه ومقدره يعنى إيه جواز ويعنى إيه بيت، وهاتكون متمسكة بانجاح جوازها الثانى أكثر من أى بنت عادية، يعنى أنا مش باقولك إن تجربتها الأولى كلها مساوئ، لكن عايزاك تكون واعى للموضوع من كل جوانبه قبل أى شىء.

4) هل أنت فعلا لمست فيها مميزات صعب تلاقيها فى حد غيرها بحيث تخليك تتمسك بيها وبقوه رغم كل ده؟، يعنى حبيتها لأن الظروف جت كده؟، ولاحبيتها لأنها فعلا هى دى الى كنت بتدور عليها بجد؟.

لو كنت فكرت فى كل الكلام ده، ولقيت إنها فعلا هى دى يبقى توكل على الله وابدأ رحلة الكفاح، لأنك لازم تبقى عارف إن الموضوع مش هايكون سهل، وممكن تحتاجوا تنتظروا لبعض الوقت لغاية ما الأهل (يهضموا) الموضوع، واعتقد إن الانتظار ده هايكون فى مصلحتكم أنتم أيضا، لأنك هاتكون كبرت أكتر واتأكدت من مشاعرك أكتر، وهى كمان هاتكون اختبرت شكل الحياة مع أهلك مستقبلا هاتكون عامله إزاى.

لكن أولا وأخيرا ماتتجوزش من ورا أهلك، لأن ده شىء مهين لهم ولكم ولها، لو أنتم متمسكين ببعض بجد اصبروا شويه عليهم، وهم مع الوقت هايحسوا إنه لا مفر، وممكن يقتنعوا إن هى دى إلى ممكن تسعدك أكتر من أى بنوته صغيره لم يسبق لها الزواج زى ما كل الناس اتعودت تعمل.