| هام لكل سيدة وفتاة: التوعية عن مرض بطانة الرحم المهاجرة | |
|
كاتب الموضوع | {الموضوع} |
---|
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:30 am | |
| هام لكل سيدة وفتاة: التوعية عن مرض بطانة الرحم المهاجرة الشهر ده (مارس) شهر التوعية عن "بطانة الرحم المهاجرة - endometriosis"
هحاول على قد ماقدر اجيب واترجم معلومات عن الموضوع عشان كل البنات والستات يعرفوا عنه .. مش عايزة حد يعاني زي ما انا بعاني وطبعا كل ما الاكتشاف بيبقى بدري يبقى افضل بكتير
عارفة ان ناس كتير ممكن تعترض اني هتكلم عن الموضوع واقول انه مش بس توعية لمجرد التوعية واني بوعي عشان انا مريت ولسه بمر بده .. عارفة ان فيه ناس هتشوفها حاجة عيب وناس تقول مايصحش .. بس بيني وبينكم انا شايفاه قمة الصح .. الموضوع مش مخزي عشان اخبيه .. بالعكس انا عايزة الناس تستفيد شوية من تجربني ومن المعلومات
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:37 am | |
| هام لكل سيدة وفتاة: التوعية عن مرض بطانة الرحم المهاجرة
معلومات على الماشي تخص بطانة الرحم المهاجرة: * اسم المرض العلمي Endometriosis (ينطق اندوميتريوسيس) * لون شريطة التوعية: أصفر * الشهر الخاص بالتوعية عن المرض: مارس * مرض الـendometriosis أو بطانة الرحم المهاجرة هو عبارة عن نمو غير طبيعي لخلايا بطانة الرحم لكن في اماكن خارج الرحم وغالبا ما بتكون في الاعضاء الموجودة في منطقة الحوض * لغاية دلوقتي لسه ماتعرفش السبب الرئيسي وراء مرض الـendometriosis * الـendometriosis عادة بيبقى موجود عند النساء اللي بيعانوا من العقم أو قلة الخصوبة وبيكون سبب ليه بس مش في كل الحالات * معظم النساء اللي عندهم مرض بطانة الرحم المهاجرة ما بيعانوش من أي أعراض وفي الحالة دي العلاج ما بيبقاش ضروري قوي * الألم في منطقة الحوض وقت الدورة الشهرية ووقت التبويض ممكن يكون من أعراض الـendometriosis الا انه عادي انه ييجي للنساء اللي ماعندهم المرض * بنبتدي نشك ان الواحدة عندها endometriosis عن طريق متابعة نمط ظهور الاعراض وبيتم التشخيص عن طريق السونار لكن التشخيص بيكون مؤكد لما بيكون عن طريق المنظار * علاج بطانة الرحم المهاجرة بيكون عن طريق الأدوية وإجراء عملية جراحية عشان يخف الألم وعشان الحمل يتم لو الحمل في الخطة * بطانة الرحم المهاجرة مابتبقاش حاجة بتروح في كل الحالات .. احيانا بتحتاج المريضة لأكتر من عملية على فترات لأنها بترجع تتكون تاني ومابتقفش الا مع وقف التبويض عند سن اليأس .. أحيانا تانية بعد العملية وبعد الحمل مابترجعش تاني تتكون او بتاخد فترة طويلة على ما تتكون
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:39 am | |
| هام لكل سيدة وفتاة: التوعية عن مرض بطانة الرحم المهاجرة
عارفين ايه اكتر حاجة بتضايقني في مرضي ده؟ (بطانة الرحم المهاجرة - Endometriosis ) الناس .. اه والله زي ما بقولكم كده انا ساكنة في مصر الجديدة وبدرس في جامعة القاهرة فمافيش طريقة انسب من المترو اني اروح بيها الجامعة كتير من الأوقات بحس بألم شديد في بطني وضهري وبينزل على رجلي كمان لما بستأذن حد في المترو اني اقعد مكانه او في عربية السيدات اقول يا جماعة انا تعبانة ممكن حد يقعدني؟ الكل بيبصلي باستغراب او بقرف او باستياء ومرة سمعتها بودني "هي بتقوم الناس ليه؟ دي حتى صغيرة تستحمل أمال الكبار يعملوا ايه؟ جيل اخر زمن" ومرة تانية كنت في العربية المشتركة وقدامي واحد قاعد وهينزل المحطة الجاية بصلي وشافني تعبانة ووشي اصفر من كتر الألم والنزيف فهز راسه بمعنى "تعالي اقعدي" وقام من على كرسيه وراح عند الباب .. من فين ماعرفش ظهر واحد وفي ثانية لقيته قعد مكان الشاب اللي نزل وبصلي بصة "عايزة حاجة؟" من كتر ما صعبت عليا نفسي وقتها والوجع اللي كنت فيه دموعي فضلت تنزل غصب عني .. شافني راجل عجوز وأصر اني اقعد مكانه وقال بصوت مسموع "يا خسارة على الرجالة" على فكرة مش لازم ابقى كبيرة في السن او حامل عشان يبقى من حقي اني اطلب من الناس انها تقعدني .. ولا لازم يبان عليا المرض عشان اصعب عليهم ويقعدوني .. قوتي في عدم اظهار مرضي قوتي في تحملي وصبري .. الحمد لله من فترة جبت كرسي بيتطبق صحيح هو تقيل شوية وشيلة بس رحمني من قسوة الناس في معاملتها ليا لمجرد أن مرضي خفي مش ظاهر لعيونهم
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:42 am | |
| هام لكل سيدة وفتاة: التوعية عن مرض بطانة الرحم المهاجرة ايه هو الـendometriosis أو بطانة الرحم المهاجرة؟ * بطانة الرحم المهاجرة زي ما قلنا هي عبارة عن نمو غير طبيعي للخلايا اللي بتبطن الرحم لكن في مكان خارج الرحم وبيبقى اسمه "غرس/زرع البطانة المهاجرة" * بطانة الرحم دي عبارة عن نسيج بيخرج من جسم المرأة كل شهر مع الدورة الشهرية لما مابيحصلش تلقيح للبويضة * في حالة الـendometriosis بقى خلايا النسيج ده بتثبت نفسها في نسيج تاني خارج الرحم والاماكن الشائعة اللي بتتواجد فيها بطانة الرحم المهاجرة هي المبايض، قنوات فالوب، جدار الرحم من بره والأمعاء * فيه أماكن تانية موجودة في منطقة الحوض بثبت فيها خلايا بطانة الرحم بس دي بتبقى اقل شيوعا من الأماكن اللي قلناهم فوق وهم: الفرج، عنق الرحم والمثانة * وارد بس نادر اننا نلاقي بطانة الرحم المهاجرة في أماكن خارج منطقة الحوض زي الكبد، في ندبات او اثار العمليات القديمة او حتى داخل او حوالين الرئة او المخ * قبل ما تقلقوا أحب اطمنكم ان رغم ان بطانة الرحم المهاجرة ممكن قوي تسبب مشاكل الا انها حميدة (غير سرطانية)
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:49 am | |
| هام لكل سيدة وفتاة: التوعية عن مرض بطانة الرحم المهاجرة مين اللي ممكن يجيله الـendometriosis أو بطانة الرحم المهاجرة؟ * بطانة الرحم المهاجرة بتيجي للنساء في فترة سنوات الانجاب وهي الفترة مابين بداية أول دورة شهرية وسن اليأس * مانقدرش نحدد بالظبط نسبة انتشار المرض لأن زي ما قلنا قبل كده ان نساء كتير ممكن يكونوا عندهم الحالة لكن ماعندهمش أعراض * تم تقدير ان في امريكا فيه اكتر من مليون سيدة عندها الـendometriosis (مابين 3% و 18%) والمرض ده من اكتر الاسباب شيوعا لأن يتعملهم عملية منظار او استئصال للرحم * التقديرات كمان قالت ان حوالي 20% لـ 50% من اللي بيعانوا من قلة الخصوبة أو العقم بيكون سببها الـendometriosis وان 80% من اللي بيعانوا من ألم مزمن في منطقة الحوض بيكون سببها برضه بطانة الرحم المهاجرة * رغم ان معظم حالات الـendometriosis بيتم تشخيصها عند نساء مابين 25 و 35 سنة الا ان فيه حالات اتشخصت في سن 11 سنة * الـendometriosis وارد بس نادر في فترة ما بعد سن اليأس * معلومة غريبة: مرض الـendometriosis بيجي للبيض (أصحاب البشرة البيضاء) أكتر مقارنة بالأمريكان الأفارقة والآسيويين وبيجي أكتر للطوال الرفيعين * تأجيل الحمل لسن متأخر بيزود خطورة الاصابة بالـendometriosis
* تم اكتشاف ان الوراثة ممكن تكون من العوامل اللي بتتحكم في نسبة القابلية للاصابة بالمرض لأنهم اكتشفوا ان لما بيكون فيه قريبة من الدرجة الأولى عندها الحالة دي بتزيد نسبة خطورة الاصابة بمرض بطانة الرحم المهاجرة
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:53 am | |
| هام لكل سيدة وفتاة: التوعية عن مرض بطانة الرحم المهاجرة في الأول كلمتكم على أكتر حاجة بتضايقني في مرضي (بطانة الرحم المهاجرة - Endometriosis) النهارده هكلمكم عن أكتر حاجة حبيتها في أكتر أوقات ألمي وهبدأ كلامي بحكاية
كنت في الجامعة في محاضرة وفجأة الألم جالي وكان لا يطاق أطرافي نملت ولساني تقل ومابقتش عارفة اتحرك من كتر ما بطني من تحت كانت بتتعصر من جوه (ماكنتش يومها عارفة ان تاني يوم هعمل عملية .. الموضوع جه فجأة) كمان حسيت ان معدتي مقلوبة والتعب كان جايلي من كل حتة الدكتورة اللي كانت بتدينا المحاضرة سمحتلي بالخروج وخرجت معايا اقرب صديقة ليا في الجامعة اكتشفت يومها انها قوية جدا لأنها تقريبا كانت شايلاني هيلا بيلا قعدت في المكتبة شوية لغاية مانشوف هروح ازاي جت صاحبتي دي وفي وسط مانا بتألم بصوت مسموع بصتلي بصة خبيثة كده وقالتلي "اجيبلك كيس عشان الترجيع؟" ساعتها ماقدرتش امسك نفسي وفطست على روحي من الضحك الضحك كان بيألمني أكتر فكنت بئن وبضحك في نفس الوقت لدرجة لفتت نظر اللي حواليا وبقوا عمالين يتفرجوا على المجنونة اللي قدامهم على قد ماكنت موجوعة وحاسة ان روحي بتتسحب مني على قد ما وجود اصحابي جنبي يوميها فرق معايا جدا محدش يقدر يتخيل كمية الحب والدفء اللي كنت حاساهم حتى الألم اللي كان بيسببه الضحك كان محبب لقلبي واستقر الأمر في الاخر ان دكتورة في الجامعة بعتبرها امي الروحية وصلتني لغاية الشغل بتاع بابي عشان هو يقرر هنعمل ايه حسيت قد ايه لازم انا اخلي بالي من نفسي عشان فيه ناس بتخاف عليا وحسيت ان لو جرالي حاجة لاقدر الله هلاقي اللي يدعيلي ويفتكرني بالخير ربنا يخليلي كل الناس اللي بتحبني واللي انا بحبها ربنا يخليكم ليا .. انتوا عارفين نفسكم كويس
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 2:57 am | |
| هام لكل سيدة وفتاة: التوعية عن مرض بطانة الرحم المهاجرة إيه اسباب مرض بطانة الرحم المهاجرة أو الـendometriosis؟ * سبب الـendometriosis الرئيسي لغاية دلوقتي لسه مش معروف * فيه نظرية بتقول ان نسيج بطانة الرحم المتواجد اللي بيبقى موجود في أماكن غير معتادة بيكون سببها تراجع تدفق الدورة الشهرية لقنوات فالوب وتجويف منطقة الحوض وده بيبقى اسمه الدورة الشهرية المتراجعة * سبب الدورة الشهرية المتراجعة دي برضه مش معروف * لكن برضه لازم نبقى عارفين ان وجود دورة شهرية متراجعة ماينفعش يبقى السبب الوحيد ورا مرض بطانة الرحم المهاجرة او الـendometriosis لأن فيه نساء كتير عندهم الدورة الشهرية المتراجعة بس مش كلهم عندهم endometriosis * فيه احتمال تاني ان المناطق اللي بتبطن الأعضاء الموجودة في منطقة الحوض فيها خلايا بدائية ممكن تتحور لنوع مختلف من الخلايا ومنها خلايا بطانة الرحم والعملية دي اسمها coelomic metaplasia (معلش مش عارفة اترجمها بالعربي ) * ووارد جدا ان من ضمن الاسباب المسئولة عن مرض بطانة الرحم المهاجرة هو انتقال نسيج بطانة الرحم أثناء بعض العمليات الجراحية زي الولادة القيصرية (وده بيظهر في الحالات اللي بنلاقي فيها بطانة الرحم المهاجرة في ندبات العمليات الجراحية) * أما بقى عن وجود الـendometriosis في اماكن مش موجودة في منطقة الحوض زي مثلا المخ والرئة فأنسب تفسير ليها هو انتقال خلايا بطانة الرحم عن طريق جريان الدم أو الجهاز الليمفاوي بس برضه هرجع وأفكركم ان دي حالات نادرة جدا
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 3:17 am | |
| هام لكل سيدة وفتاة: التوعية عن مرض بطانة الرحم المهاجرة اتكلمنا في موضوع بطانة الرحم المهاجرة او الـendometriosis عن: 1. معلومات على الماشي عن المرض 2. ايه هو مرض بطانة الرحم المهاجرة؟ 3. مين اللي ممكن يجيله الـendometriosis؟ ودلوقتي هتكلم على اكتر سؤال بيجي في دماغنا ايه هي اعراض مرض بطانة الرحم المهاجرة؟ * زي ما قلنا قبل كده معظم النساء والبنات اللي بيبقى عندهم المرض ده ما بيجيلهمش اعراض وفي الحالة دي العلاج مابيبقاش ضروري قوي الا في حالة الترتيب للحمل * بالنسبة للناس اللي بتجيلها اعراض للمرض بيعاني معظمهم من ألم (أغلب الوقت في منطقة الحوض) وعدم القدرة على الإنجاب * الألم اللي بيجي في منطقة الحوض عادة بيبقي أثناء وقبل الدورة الشهرية بحاجة بسيطة وبيقل بعدها * فيه نساء عندهم المرض ده بتعاني من آلام اثناء الجماع أو اثناء اخراج البول أو البراز وبيبقى حتى فحص الدكتور للمريضة مؤلم * قوة الألم ممكن تتغير من شهر لشهر وبتختلف كتير من واحدة للتانية .. فيه ناس الأعراض بتفضل تتزايد عندها في حين إن عند نساء تانية الأعراض بتقل لوحدها من غير علاج * قوة الألم في منطقة الحوض بتختلف بشكل جزئي بناءا على المكان اللي زرعت فيه بطانة الرحم نفسها: - عمق زرع بطانة الرحم المهاجرة ووجودها في أماكن فيها اعصاب حساسة كتير بتخلي الألم أقوى - زرع الـendometriosis أو الـimplants دي ممكن برضه تفرز مواد تلف في الدم أثناء جريانه وتسبب الألم - الألم ممكن ينتج لما بتكون الـendometriosis في الندبات او اماكن الجروح - وأخيرا مافيش علاقة مابين مرحلة المرض وشدة الألم * مرض بطانة الرحم المهاجرة أو الـendometriosis بيكون أحيانا من أسباب عدم القدرة على الحمل لما بيكون الزوجين سليمين ماعندهمش أي موانع تانية * لما بيتم عمل تشخيص بالمنظار كجزء من فحوصات عدم القدرة على الحمل فيه حالات بيبان فيها وجود الـendometriosis وبيبقى أغلبيتها لنساء ماكانش عندها أعراض مؤلمة تخليها تشك * معلش انا عارفة ان حاجات كتير متعلقة بالمرض ده مبهمة كده ومحبطة بس والله مش مني .. دي التقارير الطبية هي اللي بتقول أن برضه ان العلاقة بين الـendometriosis وعدم القدرة على الحمل أو قلة الخصوبة مش مفهومة 100% بس ممكن يكون ده راجع لعوامل هرمونية * وجود الـendometriosis ممكن ييجي معاه تكتلات في النسيج أو ندبات (اللي بنقول عليهم التصاقات) داخل تجويف الحوض وده احتمال يشوه البناء التشريحي الطبيعي زي اللي بيحصل في قنوات فالوب اللي بتنقل البويضة من المبيض * فنقدر نقول إن وجود مرض بطانة الرحم المهاجرة ممكن يأثر على الخصوبة عن طريق انتاج هرمونات ومواد تانية ليها تأثير سلبي على التبويض، تخصيب البويضة و/أو ثبات الجنين ((((((معلش انا عارفة صدعتكم جدا والبوست بقى طويل .. بس هانت والله مافاضلش كتير وبشكركم انكم استحملتوني وقريتوا لغاية هنا)))))) * أعراض تانية ممكن يبقى ليها علاقة بالـendometriosis: - ألم في منطقة الحوض بالذات اسفل المنطقة دي - إمساك و/أو إسهال - ألم في الضهر من تحت - إرهاق مزمن - دورة شهرية غير منتظمة أو تيجي بنزيف - وجود دم في البول * فيه أعراض نادرة للـendometriosis ومنها ألم في الصدر أو كحة بدم نتيجة وجود بطانة الرحم المهاجرة في الرئة و صداع و/أو تشنجات نتيجة وجودها في المخ (((((((اخيييييييرا خلص البوست الحمد لله .. زهقتكم انا معلش انا اسفة)))))))
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 3:30 am | |
| هام لكل سيدة وفتاة: التوعية عن مرض بطانة الرحم المهاجرة اعمل الصح لا والله ما بقلش .. بتكلم جد اول ما شهر مارس بدأ ورغم اني كنت ناوية من قبلها موضوع التوعية ده سألت نفسي .. هل فعلا صح اني اتكلم عن مرضي وأوعي الناس عنه من غير ماتكسف اني اقول ان عندي المرض ده؟ (بطانة الرحم المهاجرة - endometriosis) طب انا عندي اكتر من 1.200 فريند في الليستة وفيه ناس منهم بصراحة ماعرفهمش ومش فاكرة اصلا مين اللي ضاف التاني وفي أي ظروف هل فعلا صح اني اتكلم عن تجاربي قدام كل دول؟ وبعدين عندي عدد ولاد ورجالة كتير برضه معارف مدرسة وشغل وجامعة وغيره بقابلهم وبشوفهم حتى ولو مش بشكل منتظم هل فعلا صح اني اتكلم عن مرضي النسائي قدامهم؟ وبعدين لقيت نفسي بسأل سؤال تاني: انا الحمد لله عندي علم وكمان قدرة على الترجمة وعندي خبرتي وتجاربي في سنتين تعاملي مع المرض هل من الصح اني أخبي ده واكتمه جوايا عشان مش عايزة اسمع "ايااااه عييييب"؟ الاجابة على السؤال الأخير ردت على بقية الاسئلة طبعا مش صح اني اخفي عن الناس علم ومعلومات ممكن تفيدهم وافضل محتفظة بيهم لنفسي واتجاهل ان الشهر ده هو شهر التوعية عن المرض وأكيد مافيهاش حاجة اني اوضح ان انا عندي المرض ده عشان لو حد عنده سؤال مايتكسفش او يتردد انه يسأل وايه يعني لما 1.200 واحد/ة يعرفوا ويسمعوا تجاربي ده انا كمان خليت البوستات دي public عشان اكبر عدد يستفيد وماعتقدش ابدا اني لازم اتكسف من وجود ذكور على البروفايل عندي لا حياء في الحلم وأحب أحيي شاب بعينه بيساعدني من نفسه في نشر التوعية دي أوعى تخاف او تتكسف انك تعمل حاجة انت واثق ومتأكد انها صح أوعى تخبي وتداري علمك وتحتفظ بيه لنفسك عشان خايف الناس هتقول ايه أوعى تخلي اللي حواليك هم اللي يحددولك تعمل ايه وماتعملش ايه استفتي قلبك في كل حاجة بتعملها لأن قلبك هو بوصلتك وطالما ما بتأذيش حد (وبالعكس بتفيد الناس) فكك من أي حد يقولك "بلاش" امشي بدماغك واعمل الصح
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 3:41 am | |
| هام لكل سيدة وفتاة: التوعية عن مرض بطانة الرحم المهاجرة مرض بطانة الرحم المهاجرة وخطورة الاصابة بالسرطان * بعض الدراسات بتقول النساء اللي عندهم الـendometriosis أو بطانة الرحم المهاجرة عندهم قابلية أكتر انهم يجيلهم بعض انواع السرطان زي سرطان المبايض واسمه العلمي epithelial ovarian cancer (EOC) * الخطورة دي بتزيد زي ما قلنا اكتر عند النساء اللي عندهم مرض بطانة الرحم المهاجرة واللي بيعانوا من عدم القدرة على الانجاب (اللي لسه ماجابوش بيبي خالص) لكن اتضح ان تناول حبوب منع الحمل عن طريق الفم واللي هي بتستخدم احيانا كعلاج للـendometriosis بتقلل بشكل ملحوظ خطر الاصابة بمرض السرطان * هنرجع تاني للاحباط معلش .. الرابط مابين الـendometriosis وسرطان المبايض مش مفهوم بشكل كامل * فيه نظرية بتقول ان زرع بطانة الرحم المهاجرة نفسه بيخضع لتغيرات ويتحول لسرطان * فيه احتمال تاني بيقول ان وجود الـendometriosis بيكون سببه عوامل جينية وبيئية بتكون هي سبب خطورة اصابة اللي عندهم مرض بطانة الرحم المهاجرة بسرطان المبايض
|
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 4:04 am | |
| |
|
| |
Touty Potter المدير العام للمنتدى
تاريخ التسجيل : 09/01/2011 عدد المساهمات : 285 نقاط : 467 الابراج : العمر : 30 رسالة sms : دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 14 مارس 2014, 4:07 am | |
| هام لكل سيدة وفتاة: التوعية عن مرض بطانة الرحم المهاجرة البوست ده مش انا اللي كاتباه .. مام هي اللي كاتباه مش هتكلم كتير وهسيبكم مع البوست
شهر مارس هو شهر التوعية بمرض بطانة الرحم المهاجرة الحقيقة ماكنتش اعرف اي شئ عن المرض ده رغم تعدد قراءاتي اول مرة اسمع عنه لما الدكتور وصف الحالة الصحية لبنتي الصغيرة توتي شئ مؤلم جدا نفسيا على اي ام انها تشوف معاناة حد من اولادها الام تتمنى تموت الف مرة ولا تشوف حد من اولادها ولا بناتها بيعاني وبيتعذب وهي مكتوفة الايدي ومش عارفة تفكر ولا تتصرف خصوصا كمان لما يكون المرض اول مرة تسمع عنه مش قادرة ولا عارفة اوصف الحالة اللي كنت فيها مصدومة ؟ حزينة ؟ متألمة لألم بنتي ؟ مش عارفة احدد
كل الناس تعتقد انها لن تمر بما يمر به الاخرون وانهم آخر حد في الدنيا يحصل كده لكن لما ييجي الابتلاء من الله وتبقى امام الامر الواقع بتختلف الرؤية تماما بدأت اقرأ كتير عن المرض واسأل الاطباء المتخصصين عشان افهم ! دخلنا في مرحلة العلاج لمدة مش قليلة طبعا بعد عمل آشعات وتحاليل في كل زيارة للطبيب وفي آخر زيارة بعد عمل كل المطلوب فاجئنا بتقريرالحالة اللي شقلبت حياتنا : (العملية لازم تتعمل في اقرب وقت ولو نقدر تعملها امبارح يبقى احسن من النهاردة) ياخبر كحلي في ابيض كاروهات !!!! الحالة خطيرة بالشكل ده ؟؟؟ ولأهمية السرعة وكسب الوقت بالفعل حجزنا في المستشفي للعملية تاني يوم على طول .. كان يوم صعب عليها وعلى العيلة كلها قلنا الحمد لله على كل حال والعملية نجحت وكله تمام وفترة نقاهة وتعدي.. لكن للأسف ماعدتش لأن المرض رجع لها تاني .. ومن الممكن انه يرجع في اي وقت .. وكأن تعبها وعذابها ده كله راح بلاش .. يعني ايه يا دكتور الكلام ده ؟ دي لسه عاملة العملية السنة اللي فاتت .. هي دلوقتي معرضة انها تعمل عملية كل سنة ولا ايه ؟ بصراحة الرد كان مفاجئ لنا (العلاج حيستمر لمدة سنة او سنة ونص وبعدين نشوف) يعني في الآخر برضه حنضطر نعمل العملية ونستنى شوية ويمكن يرجع تاني ؟؟؟ حد يقول لي بقى ايه احساسه لما يشوف حد من ولاده كل فترة بيتقطع منه حتة ! احساس صعب جدا ربنا مايوري حد ويحافظ على اولادكم وحبايبكم يارب ويديم عليكم كلكم نعمة الصحة والعافية .. قولوا آمين يارب العالمين .
|
|
| |
Dalal صاحبة المنتدى
تاريخ التسجيل : 08/01/2011 عدد المساهمات : 10987 نقاط : 24782 الابراج : المزاج : مهمومة ببلدي العمر : 67 تعاليق : ربّـــــي اغفر لـي ولوالـديّ
وارحمهما كمــا ربيـــــانـي
صـــغيرا واجزهمــــــــــــا
بالاحســان احســـــــــــــانا
وبالسيئات عفوا وغفـــرانا رسالة sms : الموقع : قلب أمي مصر دعاء : اوسمتي :
| موضوع: رد: هام لكل سيدة وفتاة: التوعية عن مرض بطانة الرحم المهاجرة الجمعة 19 ديسمبر 2014, 5:40 am | |
| |
|
| |
| هام لكل سيدة وفتاة: التوعية عن مرض بطانة الرحم المهاجرة | |
|