06.06.2014
عايزين التعليم كده:
لا للحفظ ...نعم للمشاركة...

مدرسة تانى..انا زهقت من المدرسة..كل اللى بعمله انى باصحى بدرى
وبقعد اسمع فى كلام وشرح من المدرس وخلاص ولازم احفظ كل ده
علشان الامتحان وبس ’ يعنى ماليش دور ولا مشاركة فى اى شئ .
.بالذمة مش حاجة ملل؟

ثانية واحدة..يعنى انت زهقان من الدروس الكثيرة ولا لأنك مالكش دور؟
لأ طبعا انا مش مبسوط لانى ماليش دورالدروس فيها معلومات ممتعة
ومفيدة وبحب اقرأها فى الاجازة, لكن الاسلوب هو اللى مش عاجبنى
ولاعاجب اصحابى..ليه نكون متلقيين بس؟
احنا بنحب المشاركة والتفاعل وده اساس التعليم فى دول كثيرة تقدمت
ولو مش مصدقنى حاحكى لكم عن مدارس اصدقاء لى فى دول تانية
اتعرفت عليهم من النت..تعالوا نسمع منهم..

فى مدارس كندا.. ماهو هدفك؟.
سما حاتم,مصرية عايشة فى كندا فى الصف التاسع يعنى 3 اعدادى
تقول:
لايمكن انسى اول يوم لى فى المدرسة هنا بعد ان تركت مدرستى
فى مصر بنهاية الصف الثالث الابتدائي حيث كنت اعتمد بشكل كامل
على حفظ شرح المدرس وما فى الكتاب الخارجى,لكن هنا وبالرغم
من انى دخلت مدرسة للعرب الا انى لقيت زملائى ومن اول يوم
معاهم فلاشات و Notebooks عليها ملاحظات وصور وفيديوهات
عن عدة موضوعات مش عارفه عنها حاجة..ويبدو ان الميس لاحظت
دهشتى وعرفت انى جديدة معاهم فرحبت بى اولا هى وكل زملائى
واخبرتنى انها تراسلهم فى الاجازة عبر الانترنت وتبعث لهم عناوين
المواد المقررة عليهم خلال السنة فيختار كل منهم الموضوع الذى
يعجبه ويبحث فيه استعدادا لمناقشة نتائج ابحاثه مع زملائه ليبدى
كل منهم رأيه ويضيف اشياء عليه وممكن يشترك اكتر من واحد
فى نفس الموضوع كل من زاوية معين..وفى النهاية تلخص الميس
كل مشاركاتهم وتضيف لها اجزاء المنهج.

.وقالت لى الميس ان مايحدد مستواى آخر السنة مش بس درجة امتحان
(الفاينال) ولكن مدى تفاعلى ومشاركتى معها ومع زملائى وقدرتى
على الوصول للمعلومات المفيدة المبتكرة.. وقالت لى كمان ان فى كل
شهر حصة عن "ايه هو هدفك فى الحياة ؟" بيقدم فيها كل واحد
المجال اللى يحب يشتغل فيه بعد كدة بحيث تبدأ تركز معاه على معرفة
كل مايخص هذا المجال وكيفية تحقيق تقدم فيه علميا وعمليا..
وطبعا الحاجات دى كانت جديدة تماما بالنسبة لى واخدت فترة وجهد
لغاية مااتعودت على ان اعتمد على نفسى وعلى مساهماتى
,بس الموضوع يستاهل الجهد.

مدارس اليابان عالما مختلفا..
مروان اشرف مصرى فى الصف الاول الثانوى باحدى مدارس اليابان
يقول :
التعليم فى اليابان مختلف تماما عن غيره,فبحكم عمل والدى قضيت اول
4 اعوام لى فى مدارس مصر ثم انتقلنا الى الكويت لعامين ثم الى سوريا
وفى كل هذه البلاد كان اسلوب التعليم متقارب فهو يعتمد على شرح
المدرس والكتاب المدرسى وبعض الانشطة المصاحبة للدرس.. لكن هنا
فى مدارس اليابان اكتشفت عالم مختلف يعتمد على اتجاهين..
الاول هو التجربة العملية لمختلف المجالات علشان نقدر نحدد اتجاهنا
فى المستقبل..يعنى مثلا بندرس احياء وفى نفس الوقت بنتدرب عملى
على مهام الطبيب.. بندرس رياضيات وبنتدرب عملى على العمل
فى البنوك والشركات الاقتصادية والتجارة .. بندرس هندسة وبنتدرب
عملى على الاعمال الهندسية والانشائية وكمان بنتدرب على الصناعات
اليدوية المختلفة وعلى اعادة تصنيع المخلفات وده شئ بيهتموا به جدا
هنا وكمان بنتدرب على كيفية خدمة وتنمية المجتمع وكيفية التصرف
فى حال حدوث الكوارث وطبعا كل ده بيكون بشكل مبسط لكن بيساعدنا
على معرفة كل المجالات واختيار المناسب لكل منا.

اما الاتجاه الثانى فهو تعلم كل مايخص التكنولوجيا الحديثة من كمبيوتر
وانترنت,سواء على هيئة معلومات او تطبيقات عملية.

وفى كلا الاتجاهين لازم نشتغل فى مجموعات وكمان لازم نتفاعل
مع مدرستنا فنحن ننظفها ونزرعها ونرتبها ونختار الوان وديكورات
الفصول.. والمتفوقون منا يخصصون ساعة كل اسبوع لمساعدة زملائهم.

فى امريكا تعليم حر مفتوح...
رانيا البدرى مصرية تدرس فى امريكا فى الصف الثانى الثانوى
تقول:
فى مدارس امريكا تعليم حر مفتوح لاخوف فيه ولاقلق من مناهج
مفروضة علينا سواء احببناها ولا لأ بمعنى اننا فى كل عام نختار
من مجموعة مواد مانريد دراسته ..فمنا اللى بيفضل دراسة المواد
العلمية واللغات ومن اللى بيحب المواد الادبية والاجتماعية وعلم
النفسومنا اللى بيفضل المواد الرياضية والتاريخية..
.طبعا ده بالاضافة للمواد التكنولوجية الاساسية على الجميع
هى والانشطة والفنون المختلفة.

ده بالنسبة للمواد الدراسية اماعن الدراسة فهى بتبدأ قبل بداية ذهابنا
للمدرسة بمرحلة اسمها "التعليم عن بعد"وبتكون عبر الانترنت
بنعرف مجموعات المواد وبيحدد كل منا ماسيدرسه خلال العام
الجديد وبعدها مرحلة "الاعداد الذاتى"وفيها بنبدأ نجمع معلومات
عن المواد اللى اخترنا دراستها,ومع بداية الدراسة بيجمع المدرس
كل ما اعددناه ونناقشه معا ويبدأ يربطه بالمنهج المقرر علينا
يعنى الحصة هنا فيها بحث وشرح ونقاش ومشاركة وتجارب
وعرض سواء بالكتب او الكمبيوتر.. واحلى حاجة ان مافيش واجب
منزلى (هوم وورك) فكل شئ بنعمله مع بعض فى المدرسة
يعنى المدرسة للعلم اما خارج بوابتها فللراحة والترفيه..
مش واجب جوة وبرة المدرسة زى ماكان بيحصل لى فى مصر
بالرغم من انى كنت فى مدرسة اميريكان.

سنة الامارات الدراسية من مشروع لمشروع
نوران طلعت زى رانيا بتدرس فى الصف الثانى الثانوى
وفى مدرسة امريكية برضة لكن فى الامارات,ياترى فيه فرق؟
الدراسة فى مدرستى ممتعة لانها تعتمد على مشاريع PROJECTS
بنعملها بايدينا من الاول للآخر بدون تدخل المدرسين اواجبارهم
لينا على اشياء اوموضوعات محددة فكل واحد بيختار المواد اللى
بيحبها ويبدأ فورا ينفذ لها مشاريع بحثية وتجارب وتطبيقات عملية
ويعرض مايصل اليه على المدرس فيضيف له النقاط المقررة
فى المنهج وبمجرد ما يكتمل المشروع بالجزء اللى اعددناه بانفسنا
مع الجزء المقرر علينا يأتى تقييم المدرس لهذا الجزء من المنهج
على المشروع واختبار تحريرى مصاحب له لكن الدرجة
المخصصة للمشروع بتكون اكبر وبعدها بينتهى هذا الجزء تماما
ولا نعود له لنبدأ فورا جزء جديد بمشروع جديد وهكذا حتى ننهى
على الاقل 7 مشاريع خلال السنة.. صحيح عمل المشاريع دى
بانفسنا شئ ممتع وبيعلمنا مهارات كتير لكن كم المشاريع كبير
وبياخذ منا وقت وجهد كبير جدا علشان تطلع حلوة.

فى فرنسا التعليم رحلات واستكشاف
سامح نجيب مصرى يدرس فى المرحلة الثانوية بفرنسا
يقول:
قبل بداية السنة الدراسية هنا تعلن المدرسة عن برنامج
استكشافى لمدة اسبوع للتلاميذ لأماكن لها علاقة بالمنهج
زى مثلا المسارح اللى بتعرض مسرحيات ادبية او شعرية
اوتاريخية مقررة علينا,والمعامل العلمية المختلفة.. وهيئات
الارصاد والفلك والفضاء والطاقة والمصانع والبنوك
والمنظمات الاقتصادية والتجارية,ده بالاضافة
" ليوم الرعب والاثارة والغموض"
وهو المخصص لزيارة ستوديوهات صناعة افلام الرعب
والخيال العلمى والمتاحف التاريخية بما فيها من قلاع واقنعة
وادوات حرب ترجع لعصور قديمة جدا ندرسها فى التاريخ
وقصص الادب القديم.

وعلى كل واحد ان يسجل مايراه مهم فى الرحلات ويقدم
ابحاث عن كيفية تطوير المجالات التى يهتم بها من بين كل
ماشاهده ومع بداية الدراسة يعرض المدرس كل مشاركاتنا
لنناقشها مع بعض ونتبادل الآراء ويقيم هو كل منا حسب قدرته
على الملاحظة والبحث ونبدأ بدراسة كل مجال
نظريا بعد ان شاهدناه عمليا..

فى مصر لا للسمع والحفظ فقط
دى نماذج لبعض اصحابى فى دول مختلفة لكن انا وكتير زي
فى مصر للاسف زي ماقلت لكم فى الاول المدرسة عندنا بنسمع
فيها الشرح اللى لازم نحفظه تماما ونحل معاه كم هائل من
الواجبات المنزلية اللي بيستغرق حلها 30 ساعة فى اليوم علشان
ننجح ونعدى السنة وخلاص ,بالرغم من ان الاحصائيات العالمية
اثبتت ان المصريين من اكثر الشعوب ذكاءا ونبوغا اذا توفر لها
المناخ المناسب للابداع.. لكن للاسف مدارسنا بتعتمد بشكل كبير
على التلقين والحفظ الا بعض المدارس اللى انتبهت لاهمية
مشاركتنا وتفاعلنا مع ماندرسه فمثلا صديقى نور الدين كمال
الطالب فى الصف الثالث الاعدادى فى احدى مدارس اللغات
الخاصة فى مصر يقول:فى بداية الدراسة يأخذنا مدرس كل مادة
فى اول حصة لهذه المادة لمكان غير الفصل حتى لانشعر بالملل
وهناك نناقش مع بعض ومعاه آرائنا ومعلوماتنا عن المقرر علينا
فى مادته بعد مايكون وصلنا عبر الانترنت مجموعة الموضوعات
المقررة علينا واعددنا ابحاث عن مانفضله منها ومع الجزء
النظرى للمواد فيه جزء تطبيقى على هيئة انشطة ومشاريع
نعملها فى ورش المدرسة وكمان على هيئة رحلات لاماكن لها
علاقة بالموضوع.. وافضل المشاركات والمشاريع تقوم المدرسة
بعمل معرض لها نشرح فيه لزملائنا ازاى نفذنا المشروع
وايه الاستفادة منه وفى النهاية تقدم المدرسة جوائز لافضل المشاريع.

اعتقد ان يوم اصدقائى دول افضل بكتير من يومى
وانا باسمع واحفظ كلام المدرس والكتاب المدرسى وبس.

طالب مصري في مدرسة مصرية في مصر.
**********************
الا يستحق هذا الموضوع المناقشة مع القائمين على التعليم؟
والله اتمنى ان يلتفتوا له جيدا ويقرؤا كل كلمة فيه بعناية
لو اردنا فعلا الارتقاء بمستوي التعليم في مصر.