زمان ايام ما كنا فى الثانوى كان يشار لشخصية الطالب الجامعى بالبنان
ده لما كنا بنستثنى القلة القليلة الفاسدة اللى فى كل فئة
و لما دخلنا الجامعة انا و زمايلى اتفقنا على ضرورة الحفاظ على الصورة اللى اتحفرت جوانا كما هى
و قد كان و لله الحمد
معظمنا كان يتحلى بالاخلاق الفاضلة
و الفاسد عندنا هو القابع بكافيتريا الكلية طول اليوم و مدى المحاضرات طناش
احترامنا لاعضاء هيئة التدريس من دكاترة و معيدين كان كبير جدا جدا
و علاقتنا بالعميد لم تكن لتذكر
ده حتى بعضنا لا كان يعرف اسم ولا شكل العميد
سبب كلامى دلوقتى هو تعجب و دهشة كبيرة اصابتنى مما يحدث الان بالجامعات عامة – و جامعة المنصورة خاصة
مظاهرات و اعتصامات و اضراب
من اعضاء هيئة التدريس و الاداريين و الطلاب ايضا
ضد رؤساء الجامعات و عمداء الكليات و حتى رؤساء الاقسام
لمطالبتهم بالرحيل
لم تظهر دهشتى فى ذلك الوقت
لان المنطقى انذاك ان يتظاهر المرؤسين ضد رؤسائهم ممن يتسمون بالفساد
يعنى لما يتظاهر الاستاذ او الادارى ضد العميد او رئيس الجامعة.. اوكيه
و لما يتظاهر الطالب ضد رئيس القسم ..عادى
انما
لما يتظاهر الطلبة ضد عميد الكلية او رئيس الجامعة
و يوصل الامر للبلطجة
ده امر مشين يدعو للغضب و ليس للدهشة فقط
طيب هو ده حصل
للاسف نعم
فين؟
هاقولكم حالا

مظاهرات و اعتصامات و اضراب و العام الدراسي الجامعى على وشك بدايته

الحل ايه طيب؟

تأجيل الدراسة و استقالة رؤساء الجامعات و اجراء انتخابات

الغريب و المضحك المبكى

ان رئيس جامعة القاهرة اللى قالوا ده حرامى و فل من الفلول و مستشار لهانى هلال و الحزب الوطنى و كده

حصل على 61% من الاصوات

يعنى اللى عارضوا ووقفوا الدنيا كانوا 39% فقط

و تلاقى النسبة القليلة عددا الاعلى صوتا اللى بتوقف المراكب السايرة هى نفس النسبة فى كل المظاهرات – ان لم تكن اقل

و اللى حصل فى جامعة القاهرة أتكرر ببعض الجامعات

بس فى جامعة المنصورة الموقرة

اختلف الامر

ازاى؟

تعالوا نشوف

توجه عميد كلية الاداب لاجتماع قصير مع عميد كلية الطب البيطرى

و بعدها قرروا التوجه للادلاء بصوتهم لانتخاب رئيس الجامعة

استقلوا السيارة و لكن السائق لم يستطع حراكا

السبب تجمع عدد كبير من الطلاب المتظاهرين ليحيطوا بالسيارة موقفين اياها عن الحركة

لانهم بسلامتهم رافضين ان العميد ده اللى اتعين فى عصر مبارك يروح ينتخب بحجة ان ده مش من حقه!!!!!!!!!

حاول العمداء محاورتهم على مدى ساعتين من دون جدوى

حتى فوجئ الجميع – العمداء و الطلاب و سائق سيارة العميد – بهجوم

هجوم من بلطجية دخلوا الكليه حاملين العصى و الشوم

اتجهوا مباشرة نحو سيارة العميد فى هجوم بالشوم محاولين اخراجهم منها بالقوة

فما كان من العميد الا ان امر السائق بالانطلاق بالسيارة نجاة بحياتهم

صرخ السائق محاولا ابعاد الطلاب لافساح الطريق

فما كان منهم الا محاولتهم رفع السيارة

فانطلق السائق بسرعة مصيبا من اصاب للنجاة بحياته و حياة من يستقلون السيارة معه

النتيجة كانت

اصابة 15 طالب بجروح

و قيام ثورة غضب مصغرة لطلاب جامعة المنصورة

حصل فيها ايه؟

تعالوا نشوف

22000 طالب

هم قوام ما اسموه ثورة الغضب بجامعة المنصورة

للتظاهر ضد عميدى كلية الطب البيطرى و كلية الاداب اللى سحلوا زمايلهم على حد قولهم

خرجت المسيرة من الحرم الجامعى باتجاه كلية الاداب الكائنة باهم مكان بالمنصورة (شارع كلية الاداب)

اهم لزحامه الشديد بسبب الكلية و المدارس (5 مدارس) و عشرات المطاعم و المحلات

اقتحم الطلبة بوابة الكلية

ليقابلهم طلاب اخرين ممن يرفضون المظاهرات و تواجدوا بالكلية لحضور المحاضرات

لتدور معركة بسعف النخل و الكراسي

و فجأة و كالعادة

يدخل البلطجية – الراعى الرسمى للمظاهرات- بزجاجات الملوتوف و الاسلحة البيضاء

و اديها طحن لمدة ساعتين

كان وقت خروج المدارس

و منها المدرسة الابتدائى الملاصقة للكلية و اللى اتصاب منها اكتر من 50 تلميذ

و مدرسة بنتى روان واللى اتصاب منها 30 على الاقل – ده ع الماشي بس لما مروا ادام الكلية ما بالكم باللى داخل الحرب الضروس



ساعتين مروا حتى وصلت قوات الشرطة العسكرية و الحاكم العسكرى

ليتحول الشارع باكمله لثكنة عسكرية

بس ده بعد ما البلطجية كانوا نفذوا مهمتهم

و فص ملح و داب



الكلام ده حصل من خمس ايام

محصلته

شلل فى الحياة الجامعية بكلية الاداب

يصاحبه شلل فى المدارس

لخوفنا من تكرار الامر – وده وارد جدا

اللى غايظنى و مضايقنى

اللى بيعملوه الطلاب ده لمصلحة مين؟

حضرتك رايح تتهبب و تتعلم مش اكتر من كده

مالك انت و مال العميد و رئيس الجامعة؟

و بأى حق عاوز تمنع و تحتجز اى شخص كان؟

هى الفوضى خلاص وصلت للدرجة دى

حولت الحرم الحرم الحرم الجامعى لمرتع لبلطجة الطلاب و غيرهم

معنديش غير كلمة واحدة بس لامثالكم

يا حضرة الجامعى البلطجى

كفاية بقى كده

و احترم نفسك شوية

الموضوع زاد عن حده بجد والله
عيب علينا كده
مش الجامعة بس يادوللي مصر كلها بقت فوضي
هل هي دي الديموقراطية اللي عايزينها ؟؟؟؟
الموضوع خلاص فلت من ايد الحكومة ولا يمكن إصلاح اي شئ حاليا
فيه اصول واسباب مقنعة للتظاهر وابداء الإعتراض
لكن خوف الحكومة من ان يقال عليها (حكومة زي اللي قبلها)
والطبطبة والخوف من الناس وثورتهم ادوا للنتيجة المقرفة دي
دلوقتي لا الحكومة ولا المجلس العسكري
حيقدروا يعيدوا الأمن والآمان للشارع المصري
شوفي اللي بيحصل دلوقتي من المحامين ضد القضاة والله شئ مخجل
المحامي المفروض اول واحد يطبق القوانين بقى مشارك في الشغب
وقفاتهم الإحتجاجية وقفل المحاكم بالأقفال والجنازير
ومنع القضاة من الوصول للمحكمة لتأدية عملهم ده تسميه ايه؟؟؟
ماهو برضه نوع من البلطجة المشينة
لكن للأسف صدرت من فئة متعلمة وتفهم القانون كويس قوي
الشعب كله مُدان يا دوللي بتراخيهم واستسلامهم للأمر الواقع
اما بصمتهم او مشاركتهم في الأحداث المؤسفة دي
يعني تفتكري اهالي الطلبة دول مش عارفين اللي بيعملوه؟؟؟
اكيد كل واحد منهم بيحكي لأهله انه بطل مغوار وقف قدام اكبر كبير في الجامعة
فين بقى الأسرة اللي توجه وتربي وترشد ؟؟؟
فين ادب الحوار ؟؟؟ وفين ادب الإنصات ؟؟؟
وفين الخلاف في الرأي لايفسد للود قضية ؟؟؟
الكلام اللي عايزة اقوله كتير قوي لكن بجد اتخنقت من الأصناف دي
معلش يا دوللي تقلت عليكي بكلامي
لكن والله انا مفروسة بجد من اللي بيحصل