أبو تريكة مكرر

الحكاية دي حقيقة وحصلت بجد حكاها لي صديق

قال

كنا فى مرة خارجين أنا و أصحابى و قررنا نروح النادى الأهلى

فيه مكان هِناك أسمه المرسىَ تابع للنادى و هو على شط النيل مُباشرةً

فكُنا بنلعب لعبة طريفة بالورق إسمها النجم

فحظى خلانى أنا النجم فى اليوم ده

المُهم إصحابى كانوا بيتعاملوا معايا مُعاملة نجم بقى قاعد معاهُم

تشرب حاجة يا نجم؟

قاموا يتصوروا معايا

و كُل واحد فيهُم إتصور صورة خاصة أنا و هو بس

بعد كِده كلهُم إتلموا عليا و إتصوروا صورة جماعية

فكان فيه أسرة خليجية قاعدة على ترابيزة جنبنا

أب و اُم وطفلين صُغيرين

فقام الأب جاى عليا و بيقولى

أرىّ الكِل بيتصور معك مين إنت؟

قلت له إيه ده إنت متعرفنيش؟

قالى و الله ما بعرفك مين إنت؟

قلت له أنا الكابتن محمد أبو تريكة بتاع النادى الأهلى

قالى أد ايش إنى نحب لعبك ياكابتن بس شكلك فى التليفزيون غير الحجيجة

قلت له إنت عارف بقى شُغل الكاميرا

قالى بدى نِتصور معك

قلت له إتفضل فراح جاى واقف جنبى و إتصور معايا على أساس إنى ابو تريكة

وجاب أسرته كلها إتصورت معايا

وقعدت أنا طبعاً على ترابيزتى تانى

وهو قام بمُنتهى الفخر

قال للجرسون: طلبات الكابتن كُلها عندى

قلت و الله كويس ده أنا هفترى

شوية و لاقيت داخل من الباب أبو تريكة الحقيقى
.
.
.
.
.
.

((( إجرىّ يامعلم)))

و رحت واخد بعضى و قايم و معايا أصحابى طبعاً

و الناس إتلمت على أبو تريكة الأصلى مش المُزيف رحنا طبعاً خارجين

و مش عارف الرجل الخليجى ده مُمكن يكون مات بالسكتة القلبية

لما عرِف إنه شال مشاريب مش مشاريب أبو تريكة

بس حد قاله يتباهى و يتفاخر و يقول المشاريب عندى

الشهادة لله أنا مفترتش عليه

أنا كل اللى خدته مشاريب بحوالى 200 جنيه بس

وحظه الحلو إن أبو تريكة الحقيقى جه وأنقذه منى

يالله حظوظ.

يا رب تكون عجبتكم زي ما عجبتني

أبو تريكة مكرر