و الله كل الاخبار بقت تحرق الدم

و يمكن من كتر الهم و الاحباط كمان معنتش عارفة انقل اخبار

الاخبار معظمها اضرابات

ثم مفاوضات

ثم حلول شبه مرضية

ووعود بالاحسن بعدين

فتلاقى باقى الفئات مش عاجبهم ان غيرهم تتحل مشاكله و هما لا

فيدخلوا فى اضراب

ثم مفاوضات

و هكذا دواليك

انما يمكن اكتر خبر حرق دمى بجد

هو اللى بيحصل من امبارح فى مطار القاهرة الدولى

الموضوع بدأ بحالة تكدس للرحلات

بسبب بطء فى عمليات الاقلاع و الهبوط

بعدها ظهرت اتهامات للمراقبين الجويين انهم بيعملوا كده كنوع من الضغط على الهيئة لتحسين اوضاعهم

بعدها و فجأة

اضراب عام للمراقبين الجويين بالمطار الجديد

و توقف تام لحركة الطيران

يعقبه

تأجيل رحلات

ثم الغاء رحلات

فوضى بالمطار

و مظاهرات من الركاب المساكين

وصلت انهم لما حاولوا يؤجلوا رحلة متجهة لجدة بعد صعود الركاب للطائرة .. نزلوا الركاب و افترشوا المهبط لحد لما جابوا لهم طيارة تانية طلعت بيهم على جدة (مسخرة)

و طبعا مفاوضات مع وزارة النقل

ووعود من الوزير بزيادة قدرها 3000 جنيه

و برضه مفيش فايدة

الى ان تم التوصل لحل

و تم تقدير الخسائر

طلعت كام؟

تخيلوا

يومين بس

30 مليون دولار

ده غير سمعة الشركة اللى راحت خلاص (ودى بالمناسبة شركة مصر للطيران)

و طبعا الرحلات هتطلع

بس بمنظور جديد

على مبدأ "على اقرب حتة و نزلنى يا اسطى"

يعنى لو سيادتك رايح السعودية

يبقى انزل جدة (اقرب نقطة للبلدين) و مع نفسك بقى يا عسل

ايه بقى اللى حارق دمى اوى كده

اقولكم انا ايه؟

الخبر ده حرق دمى على مستويين

مستوى عام

و مستوى شخصى



بالنسبة للمستوى العام

الناس اللى بتهلل دايما و بتنتقد بعد ما الرحلات اتأجلت و اتلغت طالبوا بايه؟

طالبوا بتدخل القوات الجوية

و استنكروا دور المجلس العسكرى المشين - زى ما قالوا - فى انه مبعتش مراقبين جويين يقوموا بمهمة الناس اللى عاملة اضراب

طيب يا محترمين يا اللى معادلكوش مكان الا برامج التوك شو و التحرير

انتوا ازاى بتطالبوا المجلس العسكرى انه يتدخل و انتوا منظمين بكرة جمعة "عودوا الى ثكناتكم"؟!!!!!!!

ده اول حاجة

تانى حاجة عامة برضه

فين الباشمهندس وزير الطيران اللى موجود فى الحكومة القوية المهيبة بتاعتنا؟

و لما باقول فين انا قصدى فين هو من الفريق احمد شفيق وقت ما كان وزير طيران

و مجال المقارنة لازم دلوقتى يا حضرات

ليه؟

لان نفس الموقف اتكرر من فترة وقت ما كان الفريق شفيق وزير للطيران ايام النظام السابق

بس اتحل ازاى

اول ما اتعمل اضراب

تانى يوم

كانت الوزارة عاملة اعلان فى الجرايد طالبين فيه مراقبين و برواتب مضاعفة

فكانت النتيجة ان الناس المضربين رجعوا لعقولهم تانى و رجعوا لاشغالهم و بنفس الاجر

اياكش نتعظ بقى

لا طبعا

اما بقى حرقة دمى على المستوى الشخصى

فهاقولكم حالا

زوجى العزيز وقت ما جاء اوان سفره كان مقرر انه يسافر برى

بس سمعنا قبل السفر بحاجات بسيطة عن اضراب للعمال بالميناء و ان الناس بايتة على الرصيف من اكتر من اسبوع

فقرر انه ميبهدلش نفسه و يسافر طيران و الامر لله فى سعر التذكرة اللى ولع فجأة و من دون سابق انذار

و اتكل على الله يوم الاربعاء الموافق 7/9/2011 على طيارة 11 مساءا

تمام؟

لا مش تمام

بعد الميزان و الجوازات و اشارته لينا بانه كله تمام ومع السلامة ووقت ماتوصل بالسلامة رن عليا و كده

أُفاجأ انه الساعة واحدة بيتصل عليا عشان يقولى انه لسه فى المطار

طيب ليه؟

لان عمال الشحن عاملين اضراب و الشنط لسه مطلعتش و الرحلات اتأجلت لاجل غير مسمى

و انه فيه ناس من امبارح و لسه بايتين فى المطار

يا نهااااااااااااار

"طب و الاكل اللى معاك اللى هيبوظ ده؟"

فكان رده "لا و انتى الصادقة و شغلى اللى لازم استلمه بكرة اعمل فيه ايه؟"

و طبعا و كالعادة

فييييييييييييين غلى ما تم التوصل لاتفاق مرضى

و رجع العمال لعملهم

و انتظمت الرحلات

كنا بقينا تانى يوم

و كان كل الاكل اللى عمالة اجهز فيه لمدة اسبوع بقى بطاطا

و تم خصم مبلغ كبير من راتب زوجى لتأخره فى موعد المباشرة - واستلام العمل عند السعوديين ده بالذات بالسنة كلها

يبقى مش بالذمة كل اللى قلته ده يحرق ابرد دم؟!

اسيبكم بقى دلوقتى مع تفاصيل الخبر اللى قلب عليا كل المواجع دى و هو منقول من اليوم السابع

تشهد صالات السفر بمطار القاهرة حالة من الغضب بين ركاب الرحلات بعد تأخر إقلاعها وإلغاء بعضها، وهو ما دفع الركاب للتظاهر داخل الصالات واقتحام بوابات الجوازات بالمطار الجديد، ونددوا بمسئولى وزارة الطيران ومجلس الوزراء والمجلس العسكرى، واتهم الركاب الحكومة بالفشل فى إدارة الأزمة وعدم تحرك المجلس العسكرى بإرسال بعض كوادر القوات الجوية التى تستطيع القيام بمهام ضباط المراقبة الجوية.

ورفض ركاب طائرة مصر للطيران المتجهة إلى جدة صباح اليوم العودة لصالات السفر ونزلوا إلى أرض المهبط بعد علمهم بأن الرحلة سيتم تأجيلها، ثم تم تجهيز الطائرة، وتم نقل الركاب للطائرة وهى الآن على وشك الإقلاع.

من جانبه قال إسماعيل محمد إسماعيل، نائب رئيس حزب الغد لشئون الإعلام وأحد العالقين بمطار القاهرة منذ السابعة صباحاً، أن هذه المشكلة تؤكد فشل الدكتور عصام شرف القابع فى منزله بالدقى تحت حراسة رجال الداخلية .

كما طالب وزير الطيران المدنى بالنزول إلى الركاب فى صالات السفر، وتجرى الآن مفاوضات بين اللواء حسن راشد رئيس الشركة القابضة للمطارات والملاحة الجوية مع ضباط الملاحة الجوية، وهناك أنباء غير مؤكدة أن وزير الطيران وعدهم مساء أمس بزيادة رواتب بما قيمته 3 آلاف جنية لكنهم رفضوا تلك الزيادة.

بينما قال الدكتور أحمد حافظ، رئيس شركة ميناء القاهرة الجوى: "نحن الآن مع الركاب فى صالات السفر ونحاول تهدئتهم وأن الأوضاع مستقرة".

يأتى ذلك فى الوقت الذى تأكد فيه تعطل إقلاع 35 رحلة تابعة لمصر للطيران من أمس حتى اليوم، وأن أربع شركات طيران ألغت رحلاتها وهى "النمساوية والإيطالية والقطرية والعمانية".





//




__CF.AJS.init1();

و الله يا ميما حبيبتى انا ما زعلانة على المستوى الشخصى زى ما انا زعلانة على المستوى العام

البلد فى فوضى كبيرة كبيرة جدا

و الاضرابات دى محدش سلم منها

يعنى على رأى مصطفى لما قال

"انا هاجج و سايبها بيقرفونى اكتر و اكتر و انا ماشي كمان"

و ربنا بقى ما يوريكى اللافتات اللى مالية المنصورة و الورق اللى بيوزعوه عشان الاضرابات و المشاركة فى ايام الجمعة

حاجة بقت تقرف بجد

و بعدين شوفى فى الخبر

المفتريين هيزودوهم 3000 جنيه و مش عاجبهم

و غيرهم مش لاقى 300 جنيه بس

و انا و الله يا ميما مؤمنة جدا جدا بقضاء ربنا

لانه عمرى ما خذلنى حتى فى احلك اللحظات و لله الحمد كانت بتبقى فى صالحى

الف حمد و الف شكر على كل شئ

انما لحظات الغضب دى بتبقى غصب يا ميما

انتى اكيد فاهمة

سيبك انتى

الاهم كوباية الليمون دى

ولا كلمة بجد و جت فى وقتها

الف شكر ليكي حبيبتى

مش هاقولك غير اللي ربنا قالوا {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة: 216]}.

بجد ماتعرفيش الخير فين, فما عليكي إلا الصبر والاحتساب...


واحب اذكرك بجملة جيلة جدا سمعتها من الشيخ الشعراوي رحمه الله عن الرزق, كان بيقول ان رزق الانسان هوا المال اللي هوا بيصرفوا فعلا مش اللي بياخده (مرتبه او ما شابه) فممكن شخص يكون مرتبه كبير ولكن مكتوب ان رزقه قليل فتحدث له حادثة (مرض, خصم, سرقة) فيضيع ماله إلا ما كتبه الله انه رزقه فاما ما ضاع فهو رزق احد غيره


ربنا بسترها علينا جميعا ويوقفنا

ليك حق يا ميدو

و كلام الشيخ الشعراوى فيه من العقل و الحكمة الكثير

بس انا و الله الفوضى اللى ف البلد هى اللى مزعلانى عن اى موقف شخصي

كمان ردود الفعل من الحكومة اللى نايمة فى العسل دى

حاجة تنرفز بجد

و كله كوم و الديون اللى اعلنها البنك المركزى دى كوم تانى

ان الناس تخلى عندها دم

ابدا

انا لما عرضت تجربة المطار اللى مر بها مصطفى

كان قصدى الاساسي اوضح

انه الموقف ده حصل قبل كده على مستوى محدود و مع نفس الشركة

طيب مش يتداركوا الموقف المرة دى؟

بلاش هما

الحكومة مش كان ممكن تستفيد من موقف الفريق شفيق؟

ده اللى يخوف بجد

تحس ان البلد ماسكها ناس غرقانة فى شبر مياه

مشكور على المرور يا ميدو

هوا احنا عندنا حكومة؟
انا حاسس ان كل الوزرا في الحكومة الحالية من نظام (موظف بدرجة وزير) لا فيهم حد بيحل او بيربط


انا حاسس كلامك جدا لأني كنت في موقف قريب نوعا ما وبرضة اتأجل سفري (كان المفروض من اسبوع)
بس هوا تقريبا هيتأجل بالنسبالي للأبد :lol:

و الله احسن يا ميدو ان الواحد ميخرجش بره البيت مش بره البلد

اضراب فى المطارات

و اضراب فى الموانى

و حتى بتوع هيئة النقل عاملين اضراب

فاللى عاوز يفتح باب بيته

ياخدها موتوريجل اسلم

حاجة تفرح بجد

مفيش داعى للانزعاج يا ست الكل

انا لسه منزلة الموضوع امبارح بس

و انا و الله مقدرة ربنا يكون بالعون حبيبتى

و الله ليكى حق فى كل كلامك يا دودى

مش الاعتصامات بس هى اللى دهورت الاقتصاد

السياحة و الاستثمار كمان

و المشكلة بقى انه كل شئ بقى معلن

امبارح قريت خبر نشرته صحيفة ها آرتس الاسرائيلية بشماته نحسد عليها بصراحة

عن مدى تدهور حال الاقتصاد المصرى و انه مصر على وشك اعلان افلاسها

مصيبة كبيرة و خطر كبير

و اتمنى انه الناس تتداركه

والا هنندم بعد فوات الاوان

مشكورة على المرور يا ست الكل