امبارح انا حسيت فجأة اني مش طبيعية
وأني عايشة وسط عالم ماعرفهوش
من غير مقدمات اللي حصل كالآتي

أنا امبارح مروحة من الجامعة متأخر شوية
بسبب التحضيرات اللي بنعملها عشان أمين حداد
جايلنا يوم الخميس اللي جاي في أمسية شعرية وندوة
وبغض النظر عن ده انا ببقي راجعة ميتة بسبب المشوار
اللي عبارة عن ساعة ونص رايح وساعتين جاي
ده غير المحاضرات والحاجات اللي بتحصل في الجامعة
المهم اني بمشي جوة الجامعة عشر دقايق لما بخلص
عشان اوصل للباب بتاع المترو وبعدين باخد المترو
سبعتاشر محطة ومنهم تحويل في السادات عشان اوصل المطرية
امبارح فيه ولد اسمه مهران كتر خيره قعد معايا لغاية ما خلصت
واتمشينا مع بعض لغاية المترو وركبنا مع بعض
حولنا في السادات وهو نزل الشهداء وانا كملت لغاية المطرية
نزلت من المترو مش شايفة قدامي رغم اني قعدت في نص الطريق
تعبانة جدا وهموت وانام وما صدقت اني نزلت من المترو عشان هركب
الميكروباص اخيرا وهبقي في سلام وقاعدة مرتاحة وبقرب من البيت

انا ليا مكان محدد بحب اركب فيه اللي هو الكنبة الاخيرة علي اليمين
سواء كنت رايحة ولا راجعة لسببين مهمين بالنسبة لي علي الاقل
اولا عشان ابقي جنب الشباك واعرف اتنفس لأن عندي مشكلة في اللنفس
السبب التاني عشان اقدر اسند راسي لأني مش بعرف اسند غير يمين
واللي بيبقي عايز يدخل بيدخل عادي مش بزنق الدنيا يعني

المهم العربية اللي طالعة خلاص اتملت وطالعين العربية اللي بعدها
فركبت في مكاني عادي جدا والعربية بدأت تتملي وبعدين
جات بنت صغيرة طلعت دخلتها جنبي ومامتها شايلة شنط اخدت منها
واحدة وحطيتها علي رجلي وشلت منها التانية حطيتها جنبي عشان
تعرف تطلع وتدخل تركب .. طلعت عادي جدا ودخلت اخدت مني شنطة
وانا خليت التانية معايا عشان محدش يعمل مشكلة علي المكان بالذات
ان هي معاها بيبي يعني فعشان ماتبقاش مزنوقة وكمان شايلة

كده مكانين من الاربعة اتملوا ..اللي جوه خالص واللي بره خالص
كل اللي عايز يطلع يركب بعد كده رجالة وكلهم بقي التدين نزل عليهم
مش عايزين يركبوا جنب ستات .. فسواق الميكروباص بيقولي
ادخلي جوه يا مدام .. انا بصيتله وضحكت وعدت وراه "مدام؟"
وبعدين هبتدي اتكلم واقول "انا ماينفعش أقعد غير جنب الشباك"
واشرح لقيته بيقولي "أنا بكلمك" فقلتله "وأنا برد عليك"
لسه هكمل كلامي واعيد تاني لقيت اتنين سواقين تانيين جم جنبه
وبقوا التلاتة بيزعقوا فيا وانا بحاول افهمهم وحاولت اعلي صوتي
بس صوتهم وهم بيجعروا غطي عليا وفي الاخر جيت احط الشنطة
بتاعتي علي كتفي عشان انزل لقيته بيقول "خلاص العربية دي
مش طالعة اتفضلي انزلي" عشان تيجي من عنده يعني
حطيت الشنطة بتاعت الست دي جنبي علي الكنبة وقمت
غصب عني وانا بتحرك قلتله "لو سمحت اتكلم معايا باحترام شوية"
وماحستش بنفسي وانا بتكلم فقعدت ادمع لغاية ما كل اللي راكبين
قالولي "ماتقوميش وماتنزليش واحنا هنشيل الليلة كلها"
قلتلهم "لأ انا مش هركب او هتعامل مع ناس بتتعامل معايا كده"
قالولي "ماتنزليش" وقفلوا الباب وقالوله "اتحرك"

في الاول ماكانوش عايزيني ادفع خالص بس في الاخر
رسي الموضوع علي اني دفعت اتنين وهم شالوا الباقي
فضلت طول النص ساعة للبيت عمالة اعيط ومنكمشة
علي نفسي ناحية الشباك وحاسة اني خايفة وبردانة
واني لوحدي وصغيرة قوي في عالم كبير قوي
ضعيفة قوي في عالم الضعيف فيه يموت لو مالقاش
اللي يحميه من اللي حواليه .. احساس غريب
اول مرة احسه في حياتي بالشكل ده

ما صدقت بصراحة اروح البيت
ومروحة بجري في الشارع

منظري بقي واللي حصل في البيت
وحالتي النفسية والعقلية والجسدية
دودي توصفهالكم عشان مابقاش ببالغ

هل أنا مش طبيعية؟
هل اللي حصل ده عادي؟
عشان كل اللي حواليا يقولولي
"انتي ماحصلكيش الموقف ده قبل كده في البلد دي؟"
و "انتي بتعيطي علي ايه؟ عادي يا بنتي اهدي"
هو الطبيعي ان الموقف ده يحصلي يعني والغريب انه مايحصلش؟
انا مابقيتش عارفة الناس بتفكر ازاي بصراحة .. انا تعبت

هههههههههههههههه
يا بنتى ده اولكشي ف المواصلات
بعدين حبيبتى هما السواقين بتوع الميكروباصات كده
و كده بقى ده كان قمة الادب معاكى
امال لو حكيتلك ع اللى كان بيجرالى انا
و اهوه
عايشة و حى ارزق يعنى
و باركب الميكروباصات انا و مصطفى و بنديها خناقات و مية مية يعنى
هههههههههههههه
يا بنتى
كبرى على جمجمى على نفضى
و لو مقدرتيش يعنى لرحلة "حول العالم" بتاعة مشوار الجامعة دى
فادامك حل م اتنين
يا تجيبيلك بودى جارد تخصص خناقات مواصلات
يا اما بقى دودى تخلع بلاط البيت كله
و تديها عربية سبور لتوتى
و بالشفا ان شاء الله

بصي يا دوللي
انا مش متعودة حد يتعامل معايا كده
وبعدين انا ماعملتلوش حاجة عشان يعمل كده
واصحابه البقر الاتنين دول مالهم اصلا؟
جايين يجاملوه فيا يعني ولا ايه؟
مالقوش حد يتشطروا عليه غيري؟
انا صعبت عليا نفسي وبقيت مربعة ايدي
زي الطفلة اللي في الحضانة وعمالة اعيط
الحمد لله ان الدنيا كانت ضلمة ومحدش شافني

انا الموقف ده اتكرر معايا قبل كده بس مش بالظبط
يعني كانوا بيقولولي ادخلي جوه فبقولهم ماينفعش
عشان كذا كذا كذا فبيسكتوا والمرة الوحيدة
اللي واحد فيها زعق وبدأ يجعر انا بمجرد ما عليت
صوتي هو بدأ يهدا ويسمع .. بعدها بفترة طويلة
بالصدفة وانا راجعة كنت هركب في عربيته
لقيت واحد قاعد مكاني فقبل ما ألف واروح
للعربية اللي بعدها قام قاله يتحرك عشان اقعد
انا علي جنب وان ده المكان بتاعي
رغم ان كان فيه ناس تانية ممكن تركب
يعني مش كمالة عدد عشان يتحرك
لكن ده اللي حصل امبارح ما كانش طبيعي أبدا

انا لغاية دلوقتي عندي اكتئاب
مايعلم بيه الا ربنا بجد
ربنا ينتقم منه

هشششششششششششششش يا توتى
يخرب عقلك
هدى شوية الا الراجل و جوز البقر يسمعوكى
و يكمل زعيقه معاكى
هههههههههههههههههه
يا بنتى انتى هيجيلك اكتئاب من ايه ولا ايه بس
خلى سواقين الميكروباصات دول بره لستة الاكتئاب
و اتعايشى حبيبتى
و بعدين اصلا يعنى هما لما يشوفوكى حتة بسكوتة شقرا ماركة فرنساوى
و رايحة تزعقى بصوتك النمنم ده كمان
تفتكرى يعنى هيكشوا مثلا
ده ياكلوكى اكل يا بنتى
عامة متزعليش يا قمر
ادينى بس رقم الميكروباص
و انا ابعتله المينى ديناصورات ينسوه اسم اللى جابوه

والله مش عارفة أقولكم إيه !!!!
انا جالي حلة رعب لما توتي رجعت من الجامعة امبارح
خصوصا ان كان فيه إنتخابات في الجيزة يعني منطفة الجامعة
حالتها كانت صعبة جدا ولو شوفتها كنتوا قعدتوا تعيطوا جنبها

زي ماقلتي يا دوللي توتي حتة بسكويت ناعمة ورقيقة جدا
كنت فاكرة ان الجامعة حتعلمها شئ من الخشونة شوية
لكن الطبع يغلب التطبع
الحمد لله جت على خير
انا والله كنت حنزل أضربه ..دي توتي يا ناس
حد يعمل معاها كده ؟؟؟
لكن وفيق قال لي (يعني هو حيفضل مستني لحد دلوقتي )
لكن والله العظيم تلاتة لو توتي شافته واتعرفت عليه
حيكون نهاره زي ليله واللي يحصل يحصل بقى

ماتزعليش حبيبة قلب مامي
الأيام حتعلمك كتير وحتعرفي تاخدي حقك
بس اوعي تتغيري يا توتي للأسوأ
ربنا معاكي حبيبة قلبي ومع كل اللي زيك في زمن مايعلم به الا ربنا
يالاااااااااااا بقي تعالي لمامي خدي بوسة يا قمراية
اكيد دي حتنسيكي المأساة اللي حصلت
ههههههههههههههههههههههههه

بجد كلامك وتعبيرك عن الموضوع مؤثر جدا خليتيني
ادمع يا بنوتة ونا بقول ليه صحيت اليوم من النوم وانتو
ببالى وعاوزة اجيلكم حتى قلت الكلام ده لـ دودى
زي مايكون قلبي حاسس ان في حاجة
بصراحة يا توتى بلاش البوسة دي حتتعبك اكتر
ههههههههههههههههههههههههههه
حبيبتي توتى انتى لسا ببداياتك يعنى لسا حتشوفي كتير
واللي يعيش ياما يشوف وزي ماقالتلك دوللي كويس انها خلصت
على اد كده دول ناس ما بيعرفوش يحكو ولا يتفاهمو يا بنتى
الحمد لله انها جت على قد كدة
انتى لازم تتماسكي وماتكونيش ضعيفة اوى كده يا توتى
يعنى لازم تكوني اقوى من كده حبيبتي لان بهالايام الضعيف
مالوش مكان بكرة تكبرى والدنيا تعلمك كلنا لسا بنتعلم حبيبتي
تنبيه لما تتعرفي عالسواق ده قوليلي يا دودي اخى اضربو معاكي
معاكي للنهاية
والحمد لله على سلامة الجميل

ههههههههههههههههههههه
بالله عليكى يا توتى
امانة يا شيخة
خدى لولو و دودى النهاردة على هناك
و متنسيش كاميرا ديجيتال تصور لنا الاحداث
هههههههههههههههه
بس الاول فكريهم يكتبوا وصيتهم
ههههههههههههههههه
ده ايه الشجاعة المتناهية اللى حلت على الجنس الناعم دى
الغريب قى يا جماعة انه مفيش اى رد للموضوع جه من جانب الاعضاء من الجنس الخشن
ما شاء الله تبارك الله شكلهم كده عارفين اللى ممكن يحصل
فخادوها من قصيره و عزفوا عن المشاركة بالرد
اياكش نتعظ احنا بقى
هههههههههههههههه