والله يا علا الموضوع ده واجع قلبي جدا من ساعتها
ربنا يرحمهم برحمته ويلهم أهلهم الصبر على الإبتلاء
هم دلوقتي في الجنة والأعمار بيد الله
لكن ماحدش يقول لي الرئيس مالوش دعوة بالموضوع
الرئيس مسؤول عن البلد وارواح المواطنين
لأنه راع وكل راع مسؤول عن رعيته
لو قلنا مش هو المسؤول لأنه ماكنش سايق القطر
ولا سايق الاوتوبيس ولا حارس المزلقان
لو الأخوان بالذات حيتكلموا بالمنطق ده
يبقى كمان المنطق يقول ان مبارك يطلع براءة لأنه
مش هو اللي قتل المتظاهرين بإيده
وكل المتهمين في موقعة الجمل يخرجوا من السجون
لأنهم لا ركبوا جمل ولا حصان
بالمنطق بتاعهم ده يبقى كل المحبوسن دلوقتي وطالبوا بالقصاص منهم أبرياء
كلام فارغ وحكومة هشة ويدها مرتعشة وحالتنا بقت زفت
كفاية ان هشام قنديل رئيس الوزراء لما راح اسيوط طردوه وجريوا وراه
الناس خلاص فهمت لعبتهم ومش متحملة اكتر من كده
والله كتير بقول ولا يوم من أيام مبارك
حتى ولو كانوا بيسرقونا لكن كنا عايشين في امان على الأقل
دلوقتي لا امن ولا امان ولا حتى ضروريات الحياة متوفرة
فين تطبيق الحد الأدني والأقصى للأجور ؟؟؟
الموضوع بقاله كتير ولسه ماتطبقش والناس زهقت
وكل يوم والتاني إضرابات وإعتصامات ويرجعوا يقولوا وقفتوا حال البلد
مرسي لما يحب يصدر قرار بيطلع في ساعة
زي الإفراج عن الجماعات الإسلامية
لكن لما مايكونش له مزاج يفضل الموضوع متعلق
زي الشباب والظباط المعتقلين ايام الثورة
فين الشعارات اللي كانوا واجعين راسنا بيها ليل نهار؟؟؟
ولا ده بيظهر وقت الإنتخابات بس ؟؟؟
فين المساواة وحقوق الإسان والعدل الإجتماعي ؟؟
فين حرية الإبداع والتعبير اللي فلقونا بيها ؟؟؟
وهم بيقفلوا قنوات فضائية لأنها معارضة لهم
طبعا انا قصدي دريم مش الفراعين
دلوقتي بدأت مرحلة تصفية الحسابات وربنا يستر
ربنا يرحمنا منهم ومن حكمهم قبل ما الموضوع يوصل للاخطر يا علا
انا مش قادرة اتكلم أكتر من كده
ربنا يحمي مصر واهلها من نواياهم في تطبيق الخلافة الإسلامية
لكن اللي عايز يعرف مصر رايحة لحد فين يتابع موضوع سينا
وانا متحملة مسؤولية كل كلمة قلتها