كتب في 26/7/2013
الساعة 10 مساءا

لسه راجعة حالا من الاتحادية الحمد لله
ايدي بتاكلني عشان عايزة اكتب
مش عارفة اللي هكتبه هيبقي كتير ولا قليل
لو قليل قشطة ولو كتير معلش استحملوني

كمية احاسيس ومشاعر ايجابية غريبة جاتلي ولسه عندي
كلها عاملة زحمة جوه دماغي ومش هرتاح الا لما اطلعها

عن احساسي وانا نازلة ومعايا اليافطة وبابي ماسك الاعلام
عن احساسي اني اول مرة انزل واهلي عارفين .. وكمان بابي معايا
عن الضحكة اللي طلعت لما واحد بعربية قرب مننا وسألنا "رابعة؟"
عن الوقت اللي ماحستش بيه لغاية ما وصلنا لمكان تجمع المسيرة
عن احساسي جوه المسيرة وانا حاسة بالامان وسط ناس معرفهاش
عن الهزار والضحك اللي كنا فيه وكل واحد بيتكلم مع اللي جنبه وهم لسه متعرفين
عن ابتسامات الناس اللي حواليك لما عينيك تيجي في عيون حد
عن الراجل اللي كان واقف علي الرصيف بيعيط وهو عمال يقوللي "ربنا يحميكم .. ربنا يحرسكم .. ربنا يحفظكم .. ربنا ينصركم"
عن كل واحد دعالنا وهتف معانا وهو واقف في مكانه
عن كل واحد وواحدة واقفين بعلم مصر في البلكونة بيحيونا
عن بنطلوني اللي اتقطع عند ركبتي وانا ماشية واصبح ضحية المظاهرات

عن لحظة الجنان اللي خليتني اهتف عشان ماعجبنيش سكوت الناس
عن احساسي لما لقيت الناس بتهتف ورايا
عن احساسي لما منعت ووقفت قائد المسيرة انه يقول "الشغب يريد اعدام الاخوان" عشان محدش ياخد كلامنا ضدنا
عن الولد الكوكو اللي كان بيهتف وهتفنا وراه
عن الغناء بصوت عالي جدا اللي عمري ماعرفت اغنيه لأني بتكسف
عن صوتي اللي راجعة بيه سليم رغم اني توقعت انه يروح

عن الكاميرا اللي بقت بتتخض مني لما امسكها فجأة عشان اصور حاجة او حد
عن الطفل القمر اللي قلتله يرفع العلم عشان اصوره فعمل كده وبعد ما صورته قاللي "شكرا" وكانت طالعة من قلبه
عن البنوتة النوبية السمراء اللي صورتها وفرحتها انها بتتصور
عن الراجل اللي شايل بنته اللي وقف وابتسم عشان اعرف اصورهم
عن الانسة الشقراء اللي زيي اللي رحت اسلم عليها واتصورت معاها بالكاميرا بتاعتي وطلبت مني نتصور بموبايلها كمان
عن البنوتة الصغيرة اللي جت تكلمني بالاينجلش فاكراني اجنبية
وعن الشاب اللي قال لصاحبه "ايه اللي جاب اجانب ما بيننا؟" لما شافني وانا ضحكت قوي وقلتله "والله مصرية"
عن الناس اللي قاعدة في الجنينة وحاطة صورة السيسي وعلم مصر

عن ابتسامة الشكر اللي شفتها لما كنت بوزع تمر قبل الفطار
عن احساس العطش اللي ماحستش بيه غير تلت ساعة قبل الادان
عن المياه والتمر اللي حسيت بقيمتهم قوي لما فطرت النهارده
عن قعدة كل الناس مع بعض علي رصيف المترو بيفطروا

عن اليافطة اللي رفعتها وكنت مكسوفة منها وانا نازلة عشان حاسة انها مشوهة وبدائية
عن احساسي لما بسمع حد من ورايا بيقرا اليافطة بصوت عالي وبيعلق علي المكتوب
عن احساسي مع كل واحد خبط علي كتفي عشان يستأذني انه يصور اليافطة او يصورني معاها
عن احساسي مع كل راس بتترفع عشان تقرا اليافطة
عن احساسي مع كل عين بقت بتتابع اليافطة وانا ماشية عشان تكمل اللي مكتوب عليها
عن احساسي لما كنت بسمع كلمة شكرا بعد ما بوطي اليافطة واهدي المشي عشان يعرفوا يقروها
عن مجموعة ستات زي العسل بيعرفوا فرنسيه وقفوني عشان يقروا اللي مكتوب عليها
عن احساسي لما بشوف ابتسامات الناس وانا مروحة ولسه رافعة اليافطة
عن كل عربية زمرتلي وانا ماشية
عن كل واحد قال "تيحا مصر تحيا مصر" لما شاف اليافطة بتاعتي
عن كل واحد عملي علامة اللايك حتي لو هو جوه عربية
عن كل واحد قفشته بيصورني وبيصورها وبصيتله فابتسم ابتسامة عريضة
عن الشاب اللي سألني عن اللغة التالتة اللي في اليافطة

عن الليزر الاخضر المؤذي اللي بابي اشتراهولي
عن زعيقي في الهوا "يا جدعان حرام عليكم عميتوا ام الطيار"
عن فرحتي وتنطيطي لما بيبقي فيه صواريخ ملونة في الهواء

عن الابتسامة العريضة البلهاء اللي فضلت في وشي طول مانا مروحة
عن احساسي اني سوسة لأني ماسكة اليافطة معدولة لتحت وبابي مش واخد باله
عن الميكروباصات اللي بقت بتنادي "الاتحادية روكسي روكسي روكسي"

عن مرواحي البيت والـ"اه" اللي ماقدرتش امسكها وانا بقعد لأني بدأت احس بوجع رجلي وجسمي كله
عن الفرحة اللي mom كانت فيها لما شافتنا
عن طارق اللي ما سابنيش لحظة وكان علي طول معايا علي التليفون
عن طارق برضه اللي عرفت انه مافطرش غير مياه وبلح لغاية مارجعت البيت

عن الحب
عن الحماس
عن الوطنية
عن التكاتف
عن المرح
عن الدفئ
عن التقدير
عن الفخر اللي انا حاسة بيه دلوقتي
عن كل واحد وواحدة عمل حاجة بسيطة خلت يومي يوم رائع

يابختك يا توتي كان نفسي انزل معاكم لولا ظروفي الصحية
وخوفك وخوف بابي عليا
والله حبيبتي حسيت بكل كلمتها كتبتيها
شفتها في عينيكي اول مارجعتي البيت
بصراحة حقدت عليكي لأنك نزلتي وانا لأ
هههههههههههههههههههههههههههههههه
لكن برضه انا كنت متابعة على كل القنوات
شفت قد ايه عظمة الشعب المصري بالملايين في الشوارع
شفت الطائرات وهي بتحلق فوق المتظاهرين في كل المحافظات وبتصورهم
صايمين ورغم كده متحملين درجة الحرارة الشديدة
شفت جميع اطياف الشعب المصري الاصيل
شباب وشيوخ واطفال ونساء..رجال ملتحين وسيدات منتقبات ربنا يحفظهم
شفت المسلمين وهم بيصلوا وأخواننا الميسحين بيحرسوهم
شفت مسيحيين صايمين زينا وافطروا معانا ساعة الأّذان
سمعت صوت الجامع بيأذن وجرس الكنيسة بيدق في نفس لحظة الاذان
هي دي مصر الرائعة بتاريخها ووحدتها وشعبها العظيم
ده مش غريب على الشعب المصري الاصيل اللي عاش سنين طويلة
في حب وتفاهم وتلاحم على مر الزمان وان شاء الله حنفضل كده على طول

بصي .. هو فاتك كتير :D :P
بس والله لو كنتي نزلتي كنتي هتبقي مكسحة زيي حاليا
عارفة؟ في طريقي وانا نازلة قعدت ادعي الدعاء المفضل ليا
"اللهم ارنا الحق حقا وارزقنا اتباعه وارنا الباطل باطلا وارزقنا اجتنابه"
طول ما انا ماشية وانا خايفة اكون بعمل حاجة غلط او بظلم حد
عمالة افكر "ماذا بعد اليوم؟"
بس رجعت ولقيت الفيديو ده اتصدمت
واكتشفت اني ماشية صح

انا علي طول مؤمنة بان الواحد ليه مخ وبيفكر بيه
زي ما انا ليا مخ وفكرت بيه وقررت انزل
وما اخبيش عليكي انا سمعت عن احتمال حدوث تفجيرات
للحظة خفت وفكرت مانزلش واقول لبابي ماينزلش
بس بعدين قلت "قل لن يصيبنا ما كتبه الله لنا"
ولو حصل حاجة او لقيت خطر انا شخصيا همشي
مش جبن مني بس عشان ماينفعش افضل وانتي عارفة اسبابي
بس لو فيه خطر وحد قاللي لو مشيتي هتبقي خاينة
ردي هيبقي "عبوكو كلكم .. انا اعمل اللي انا عايزاه ومحدش يزايد عليا"
بجد انا استغربت من الفيديو ده جدا .. انتي ايه رأيك في اللي بيحصل؟
هل انا نزولي كان غلط؟ هل فعلا ليا ذنب في ناس لنفترض انهم 'ابرياء' ماتت
وايه رأيك في اللي حصل في الاسكندرية؟
بالمناسبة دي الصور الحصرية اللي قلتلك عليها امبارح
صور حصرية لأحداث الاسكندرية أمس