هههههههههههههههههههههه
طبعا حتقولوا لي ايه العلاقة بينن اللاصقة والشربة انا حأقول لكم
دايما كل مابشوف اعلان اللاصقة السحرية اللي بتعالج كل الأمراض في الجسم
ماهي سحرية بقي ههههههههههههههههه
بفتكر على طول اعلان زمان قوي عن شربة الحاج محمود

وهو شخص يضع أمامه ترابيزة صغيرة وعليها بعض الزجاجات
ويافطة صغيرة كتب عليها
"شربة الحاج محمود اللي بتطرد الدود وتورد الخدود"
ويقعد الحاج محمود ده يقولك على كمية الامراض اللي بتعالجها الشربة دي

بالمناسبة شربة يعني محلول معين المفروض إنه بستخرج من ثمار بعض النباتات الزيتية مثل الخروع وده معترف به ويباع في الصيدليات ويساعد في علاج حالات الإمساك أو يؤخذ بطريقة معينة لطرد الديدان من البطن وما إلى ذلك

لكن الحاج محمود عايز ياكل عيش .. فكان يقعد يعد ييجي 100 مرض بيعالجهم بالشربة بتاعته دي واللي بدل ما يقول عليها شربة زيت خروع كان بيسميها " شربة الحاج محمود " على أساس إنها من إختراعاته ومن بنات أفكاره وحاجه جديدة ومبتكرة

وطبعاً السُذج وأصحاب الثقافة المحدودة
كانوا بيصدقوه وبيشتروا الشربة لعلهم يجدوا فيها العلاج الشافي

تدور الأيام وندخل القرن الواحد والعشرين وتعود إلينا شربة الحاج محمود
لكن بصورة " نيو لوك " وعلني وعلى الفضائيات كمان

فالآن أيها السادة نشاهد على القنوات الفضائية الخاصة ومنها الشهير إعلانات لأعشاب عجيبة وغريبة ومجهولة المصدر بتعالج ابه بقى؟؟؟؟؟؟؟ :

1- العُقم .. ويادوب تسف لها كل يوم معلقة من الأعشاب دي لمدة 21 يوم وبعدها ربنا يسهل لها بالعيال ومش هاتقدر تلاحق خِلفه وزغرطي يا أم محمد بكره تخلفي والعيال تجري وتبرطع من حواليكي ...

2- السكر .. اللي الطب الحديث لم يتوصل لأي علاج يزيل أعراضه تماماً حتى الان .. ومع ذلك بعون الله تخلصك من السكر نهائي ولا تقولي زراعة بنكرياس ولا أنسولين ولا غيره

3- ضغط الدم .. الكبد الوبائي وخصوصاً الفيرس سي .. والطحال والفشه والكلاوي ولحمة الراس

4 -كله كله وبعون الله عندنا علاج لكل حاجة بس إنت إتصل على موبيل رقم كذا وتدفع 200 وكذا جنية وكل مشاكلك تتحل

يبقى نوفر بقى مليارات الجنيهات التي تنفق على ميزانية الصحة ومليارات الجنيهات على الأبحاث الطبية وكليات الطب ونسرح كل خريج معاه ثانوية عامة بشنطة مليانة " شربة الحاج محمود " بلا طب بلا وجع قلب و7 سنين دراسة وفي الآخر نرجع لشربة الحاج محمود او اللاصقة السحرية اللي بتعالج كل الأمراض مرة واحدة
وقرب قرب خدلك معلفة من الشربة وادعى لعمك الحاج محمود.