كنت فين؟

كنت ف البيت..

بأعمل ايه؟

ما بين النت و الجزيرة..

تانى الجزيرة؟
اه تانى و تالت و عاشر و العمر كله.. و بعدين ده مش موضوعنا دلوقتى..

اه صح.. طيب كنتى حاسة بايه و انتى مرتاحة ف بيتك و غيرك بيموت نفسه عشان يجيبلك حقك؟
كنت قلقانة .. بردانه .. خايفة .. لا كنت مرعوبه و جسمى كان كله بيتنفض..

الله؟ ده انتى بنى ادمة غريبة.. طب ليه ما شاركتيش.. فهمت .. يبقى مكانش عندكوا مظاهرات اكيد..
لالالالالالالالالالالالالالالالالالالالالالا..

بالعكس.. المنصورة كانت والعة..

امال خفتى تنزلى مثلا؟ ولا انتى مع الحزب اياه؟
لا مش موضوع كده..

امال موضوع ايه؟
الموضوع و ما فيه انى نفسي ف التغيير زى كل الناس..

بس مش كده..

انا مش من الناس الهاى اللى عمالة تاكل ف اته محلولة..

ولا اتولدت و ف بقى معلقة دهب.

انا كبرت و اتربيت ف الطبقة المتوسطة - بتاعة الموظفين - زى معظم الناس يعنى..

و زيى زى الكل لا فيه شغل ولا يحزنون..

بس الفكرة ايه اللى هاستفيده من مظاهرة زى دى؟

و الله العظيم دى حاجة غريبة .. انتى يا بنتى مش شوفتى تونس و اللى حصل فيها؟

مش يمكن نتحرر زيهم؟

ايه؟ نتحرر؟ و زيهم؟

ما هو ده مربط الفرس..
و ده قمة خوفى..

تونس فعلا قاموا بمظاهرات .. غاضبة فى البداية.. سرعان ما تحولت الى ثورة..

نجحت فى التخلص من ديكتاتور علمانى متسلط..

لكن فشلت فى اهم شئ للبلد..

فشلت ف اعادة الاستقرار..

فشلت فى الاتفاق على هدف او مطلب واحد لتونس ما بعد الثورة..

فشلت انها تتفق على حكومة معينة حتى الان..

فشلت حتى فى تحديد مين يرجع و مين ميرجعش للبلد..

كانوا زينا كده..

نغير..

بس من غير ما نفكر..

و ماذا بعد التغيير؟

مين اللى هييجى بعد كده؟

فيه قائد محدد للمظاهرات دى - اللى نفسكوا تبقى ثورات؟

اه فيه.. المعارضة
هههههههههههههههههههههههههههه..

المعارضة دول كدابين زفة..

معظمهم منافقين.. بيعارضوا من تحت لتحت..

يا عم دول حتى ما اتفقوش على مكان للبرلمان اللى عملوه من نفوخهم و خلونا مسخرة العالم بيه..

مش مهم قائد.. المهم التغيير..
طب و بعدها؟ مين اللى يحكمنا؟

يوه كتير بقى..

عندك البرادعى.. ولا ايمن نور .. ولا حمدين صباحى ولا حتى المحامى اسمه ايه ده اللى رشح نفسه وودى ورقه للمجلس..
ههههههههههههههههههههههههه..

اسمه ايه ده؟ اسمه ايه طيب؟

اقولكوا الاحسن ايه؟

نجيب الملك عبد الله ملك السعودية .. ولا بلاش الا الناس هناك بدأت تعمل زينا و تولع ف روحها..

طيب نجيب السلطان قابوس .. ولا بلاش الا الناس اتظاهروا ضده من اسبوع لاول مرة ف تاربخهم..

طيب نجيب القذافى.. ولا بلاش الا الناس تقول ان اللى بيحكمنا مجنون..

طيب نجيب الملك عبد الله بتاع الاردن.. ولا بلاش ما اسخم من سيدى الا ستى..

طيب نجيب رئيس قطر .. ولا بلاش الا الناس تقول علينا خونة و اتباع..

طيب نجيب واحد من ال مكتوم .. ولا بلاش الا يخربوا اقتصادنا اكتر..

طيب نجيب واحد من ال صباح .. ولا بلاش ما المظاهرات طالتهم برضه..

بس..

وجدتها..

نجيب اكتر واحد بيخاف على شعبه و نفسه يجيب لهم حتة من السما..

مين؟

نتنياهو..

بلا خيبة ..

ده لسه امبارح كانوا بيتظاهروا هناك عشان البطالة..

و الله العظيم دى شعوب عجيبة ما يعلم بيها الا ربنا..

عشان كده انا باقول..

نفكر.. ونتروى.. لنتدبر..

و اكيد الفرج هيكون قريب ان شالله..