محمد أمين
لا هو وزير ولا محافظ.. ولا يعنيه الوزير ولا المحافظ إلا بقدر ما يدفع.. هو صاحب المعالى فى عيد الأضحى بلا منازع.. أتحدث عن الجزار.. ربما ينافسه الحلاق لحد ما.. يبقى الجزار عملة نادرة.. وقفنا على بابه وانتظرناه.. تطلعنا أن نكون فى جدوله خلال العيد.. يفاخر البعض بأن الجزار رضى عنه أولاً..

من هنا كان هذا الحوار:
- صباح الخير يا باشا.. يابو إيدين تتلف فى الحرير!

- ده انت اللى باشا يا باشا.. عوداً، وكل عام وانت بخير!

- فاكر يا معلم لما كنا سوا فى المدرسة؟.. كنت بتجنن المدرسين؟!

- آآآآه.. كانت أيام.. همه كمان طفشونى من المدرسة.. ربنا كان رايد كده!

- تصدقنى.. إنت كده أحسن.. اللى اتعلموا خدوا إيه؟!

- ههههه.. مش كده برضه؟.. كلهم بيتمنوا كلمة منى دلوقتى.. لحظة رضا!

- (يبلع ريقه) بس أنا كنت حبيبك.. غيرهم كلهم؟!

- عارف يا باشا.. ربنا رضى عنى أكتر من الناظر نفسه.. بيجيلى دلوقتى!

- (.. وبعدييين؟).. طيب هنتظرك إمتى يا معلم؟!

- يمكن تانى يوم العيد.. هحاول أفضى نفسى شوية؟!

- طيب وإنت ترضاها على صاحبك وحبيبك؟.. الناس كانت تاكل وشى؟!

- لييييه بقى؟.. فيه ناس وزرا وباشوات منتظرين زيك برضه؟!

- طيب ما تخلينى بعد صلاة العيد فى السريع كده؟.. وبعدين اعمل زى ما أنت عاوز؟!

- ممكن أدبح لك ليلة العيد.. أنا جاهز؟!

- يا راجل ودى تبقى أضحية؟.. دى حاجة ودى حاجة؟!

- خلاص أشوف أجيلك تانى يوم رابع اسم.. ده علشان خاطرك بس؟!

- أومال هنخلص إمتى؟ ونوزع إمتى؟!

- يا سيدى.. ساعتها مش هتلاقى حد تديله.. هههههه!

- يعنى مش هتعمل حساب العيش والملح؟.. عيب نجيب واحد تانى؟!

- واحد تانى؟.. منين يا صاحبى؟.. دى منطقتى؟!

- منطقتك؟.. هيه بقت مناطق؟!

- ده البتاع السايس بقى ليه منطقة.. المأذون ليه منطقة.. حتى الحرامى كمان؟!

- عرفت بقى إن اللى طلع جزار أحسن من اللى بقى دكتور؟!

- دكتور؟.. أنا كمان دكتور فى صنعتى؟!

- مفهوم مفهوم.. عشان كده احنا بنجيلك يا معلم؟!

- من الآخر يا باشا.. عاوز مستعجل بسعر وعاوز دورك بسعر؟!

- مستعجل ودورى؟!.. زى المنشار طالع واكل، نازل واكل!

- بتقول حاجة؟.. أومال إيه، كشف وفيزة؟.. كل أضحية ليها سعرها؟!

- اللى تطلبه.. بس ما تخليش علاء بيه يضحك علىَّ، ويروح يدبح قبلى؟!

- دى بقى لأ؟.. علاء باشا زبون قديم من أيام الفقر.. جمايله على راسى؟!

- هدفعلك 500 جنيه لو دبحت فى اليوم الأول.. خلاص؟!

- يبقى هتدبح قبل علاء.. وجمال، ومبارك نفسه.. هههههه!

- (يكلم نفسه) الله يخرب بيتك.. اتفقنا؟!

- سلام يا معلم شفتورة؟!

- سلام يا معالى الباشا؟.. عقبال كل نوبة!

- معالى الباشا؟.. ده أنت اللى باشا.. يا ريتنا كنا جزارييييين؟!