من ذكريات واحد مغفل
للشاعر عبد الله حسن

خدو حته مني
قولولي بس فين بلدي
وهاتولي بلدي
مش مهم اعيش
خدوا اسمي مني حرف حرف وحرف
خدوا ( ع ) و عاينو وشوفوا فين الضعف
خدو ( ب ) وبوسوا ايد شباب بيموت
خدوا ( د ) دموعي بعدهم بالالف
خدوا ( ا ) امنا بخالق الملكوت
خدوا ( ل ) ولمّوا ووحدوا في الصف
خدوا ( ل ) ولازم يبقى لينا الصوت
خدوا ( ه ) هلكنا هم فوق الوصف
خدو عمري مني يوم ويوم ورا يوم
خدو طفل كافىء لعبته بالكسر
خدوا شاب شاب الشعر منه وام
خدوا شيخ بيحني ضهره مد وجذر
خدوا عمري مني والبلد دي تقوم
وهموت وسايب ضحكتي عــالقبر
خدوا كل حاجه
ورجعولي مصر .
بصولي شوفوا اخرة التصديق
وقولولي ايه فايده طريق بيضيق
وقولولي مين الصح مين كداب
وازاي خدتنا التوهه من عــالباب
مين اللي كان جنبك وهو عليك
ومين بيحلم لوحده ومين بيحلم بيك
مين اللي تاجر بدم
ومين تاجر بالزاد
ساعة الجريمه جريمه لو تقف بحياد
والصمت على المهزله
مش مرجله دي عوره
يااهل مصر الكريمه
هتفهموا امتى
مين اللي حط السم
في الثوره ؟؟؟

لو بتحبوا البلد دى
للشاعر عبد الله حسن

لو بتحبوا البلاد دي صحيح
لو تعشقوها بجد ..
ماتلومش على واحد جريح
في طريقه مليون سد
في عينيه براءة افتحله طاقة .. شوف مواجعه
كل دمعه و ايده خد ..
عودتوا ناس على الوحدة .. و الوحدة تنسّي العدل
حاطين ملايكة على وحوش.. ولا حد فاهم حد
ماشيين نخبّط
مين مظبط ! ..
مين اللي يعرف.. مين مُزيّف .. مين بجد ! ..
واقفين ورا الأحلام طابور
برّة الحساب برّة الدنيا
السكّة دي في اخرها نور
ولا كمان شبه التانية ؟! ..
بتعلّوا ليه من فوقي سور
مابتكبروش الا عليا !

انا احمد و انا مينا
انا السكينة و المدبوح
انا اللي وقفت على المينا
بودع في سفينة نوح
انا التايه على مرايتي
و وشي ولا الشلن ممسوح
كسرت مرايتي كسرتني
نزفت مكان دمايا طموح
انا احسن واحد فيكم
انا اخر امل ليكم
انا اخر نفس بيروح

من قصيدة / ضيف عالدنيا ..

وان كان عالحُسن اللي في اسمي ..
اهو كفى الحزن اللي في جسمي ..
ومعدي مداه ..
العمر اهو كفى الاحزان ..
ولاظلمك هيدوم ياجبان ..
انا دمي بيرسم اوطان ..
يكتب ويألف ..
كان ضيف عالدنيا ..
واهو زارك ياحبيبتي وخفف ..
الواد الاسمر ..
مايخافش يقول كلمة حصانة ..
اتحدى الحُزن ..
فضل يمشي في بلاده وشاف ..
كان يضحك ..
والضحكة تخبي في عيون متخانة ..
وبحق الدم ..
اللي مغرق عربية اسعاف ..
ده لاخان ولاخوّن وخانوه ..
واتمسك بوصية ابوه ..

*يا ريتي سقطت جغرافيا*

نا اللي علموه يحسب
يا دوب لسة خلاص هكتب
و بسم الله ..
طلع عفريتك الملعون في جلابية
مسك فيا لمسني و خدت ايه من المَس
صحيح عشق الجسد فاني
لكن عشق البلد يتحس
هواكي غبا ..
وكل ما فيكي مش ليكي
بيمنعني الأدب اني
أسب الدين لايامك
و يمنعني العجز اني اكون من ضمن أحلامك
و يجبرني السهر اني افتّح عيني بالعافية
الاقيكي قصاد عيني مش انتي يا مصر
مش نيلك و مش سينا
و يا ريتي سقطت جغرافيا

فيه ناس ولا كنا نعرفها بقوا نجوم فجأة على الشاشة
ادي مبادره لحل الازمه في النوبة
و ادي المجرم بقى باشا وكله واخدها سبوبه
قيادي بجبهة المانجا بيأمر من في غيبوبة
و انا في النص متسوح
لا شايف نور ولا بارق
يوماتي بيتسرق حقي و يتقال ان انا سارق
وانا ساكت لا عارف اجيب حقوق عايشين عشان اجيب حق ناس ماتت
يافرحه في قلبي ماتمت يا ثورة يا ريتها ما قامت
خلاص والله فاض بيّا مانيش كاتب
و يلا خلاص
كلام في كلام ولا فارق
انا كداب و مش صادق و يلا خلاص
برافوا سيادة الريس
برافو حكومته و وزيره
دة كدب بلدنا هتفلس دة كله بتعبته و بخيره
تمام حلو انا كدة كويس !
سيادتك راضي كده عني
هاموت و ملايكة تلعنني لو اكدب يوم على بلدي
هموت ولا ارض تبلعني ولا تحضن جسد خاين
ولا هتطيق عفن بدني
ولا فيه حد هيساعد ولا فيه حد هيخلّص
ولا هقبل يقولوا في يوم بتاع الشِعر دة معرّض كلامه للهوى المجنون
صديقي سيادة الريس ياريت تسمع كلام شعبك
كلام الشعب ده المطحون
وسيبك من عباراتك وسيبك من اشاراتك و سيبك من زياراتك
فيه ناس عماله هنا تصرخ ...

* إهداء للشهيد الجندي *

مصر التجارة شطارة و كله بالمكيال
الدم و الدين و كل اللي قالوه بيتقال
نشجب و نرفض و ننسى
وهو ده الموال
و نغير البروفيل
و حداد على دة الحال
و يومين و اخاف تتنسي
زيك وزي الغير
شُهدا اللايك والشير
يا فرحة التغير !
يا ميت ندامة علي اللي ثار و ماطالشي
و الحي ابقى امانة يا دمعتي امشي
ما هي ماشية بالترتيب
الاولة نزعل
التانية هنجيب
حق اللي ماتوا مافيش
ولا قدرنا نموت ولا قدرنا نعيش.

* يارب انا آسف *

بشوف لكن أعمى و اضحك و انا خايف
مين سندي في الدنيا يا رب انا اسف
و سامحتني عاصي
قربتني ساجد
سيدتني على الكل
و ملكتني عابد
و اديتني من نعمتك
و زدتني حامد
و ارد بالمعصية
و برضه بتمادى
و تحبني زيادة
و كأن حتى الندم على غلطتي عبادة
اديني وجه بشوش و كتابي بيميني
طمعان انا في رحمتك
ثبتني على ديني .

انا اسمي أم الدنيا لكن بكر
علمت كل البشر معنى الحنان و الصبر
هات ايدك المنسية
قوم حسس علي شعري
شايف ابتسمتي يا واد
مين اللي عجز انا ولا انت يا عيل !
هات راسك المحنية ريحها علي حجري
و احلم بريحتي و صوتي لو الظلام ليّل
هات صدرك العريان و مدد عيش علي صدري
و اشرب و كل من العسل دة و بوسني في عيوني
الشمس لو تنحني و توطي علي جلدك
فالفخر كل الفخر انك تبقى من لوني
هات ايدك المنسية خدلك شربة من نيلي
مكتوب عليك الظما و مكتوب عليا اروي
هات شفّتك وطي بوس ارضي وتفاصيلي
مين ينحني للعلم دة بشيله فوق ظهري
هات قلبك اللي انجرح دة و غمسه في ليلي
كل الجراح بطيب يا دنيا هتمُرّي
هات عينك الباكية و خد عيني اهي باقية
هات شعرك الشايب هات لبسك الدايب
هات خبزك البايت هات وقت الفايت
هات ساعتك الواقفة و إزازة الريحة
انا بشتري اللي انجرح في ولادي و اطيّب
و ابات انا جريحة ...

لسه عايز تحتفل ..

كنا مش عارفين طريقنا
فهمونا
ان دي هي الطريقة
اللي هترجع حقوقنا
كله كان حاسس بضيقنا
كله كان عمال يشجّع
كله شاف فجأه الحقيقة
كله بيسقف ويهتف
هم دول املك يا بلدي
هم دول ورد الجناين
كملوا الثورة المباركه
كملوا الثورة المجيدة
انتباة يا ناس غلابه
حاجه واحدة اللي اكيده
احنا شيلنا الطاغية
وابتدى التطبيل يزيد
مش بشر لاْ دول ملايكه
ايوه منهم اوليا !!
ثوره ماشيه في كل حته
كانوا مليون
لاءه سته
كان ميدان الثوره سايع
من الحبايب الف الف
من اللي واعي واللي ضايع
واللي صايع
كل صنف
كله كان حاسس بنارنا
للامانه
بادية حلو و وسّخوها بالخيانه
ضيعوا احلام كتيره واللي اصعب
ضيعوا من الشعب صفه واتحاده
كله كان مدروس معاده
بالدقايق
من بداية الحرق تقفيل الشوارع
من هروب المسجونين
ولا موقعة الجمل
من طلوع البلطجية
لسه عايز تحتفل
من امتى كان ابليس بيركع
ولا فيه في النار امل؟!!
اللي عملوا مننا
وقالوا حاسين بالغلابه
ناس تبان زي الملايكه
وفيها عرق من الديابه
خلي بالك
كل حاجه وليها حد !
لسه عايز تحتفل ؟
اسال الشهدا اللي ماتوا
كان طموحهم نبقى زي مابقينا ؟
وابقى رد
لسه عايز تحتفل ؟
ذكرى ما ناس دبحوا بلدي
و ورطونا واحنا ندفع التمن ؟
لسه عايز تحتفل ؟
ذكرى اول طعنة في ضهر الوطن
لسه عايز تحتفل ؟
ثورة لا كانت مباركه ولا مجيدة
ثورة خلّت مصر تبقى عالحديدة
لسه عايز تحتفل ؟
وسط خونه وكدابين
طماعين
غدارين
لسه عايز تحتفل ؟
ذكرى وهم
بدايتة حرق
واخرة دم !
قول الف مره احنا اسفين يا بلد
بوس تراب الارض دي بدموع عنيك
قولها احنا اسفين يا بلدنا
حرام عليك !
لسه عايز تحتفل ؟

من قصيدة علاء الدين

وازاى اعيش من غير جواز
وازاى جواز من غير فلوس
وازاى فلوس من غير تعب
وازى تعب من غير علام
ازاى علام من غير كتب
وازاى كتب من غير عقول
علشان كده سيبى العيال هى تقول
حكايتها سرك ده اتفضح
لا فيه لا جنى ولا شبح
عارفه يا مصر
انا لو قابلت عفريت علاء الدين بنفسه
هقوله ليه مساعدش نفسه
ليه رضى يعيش جوه قمقم
العيال بقت بتفهم
وانت لسه قاعده بتقولى فى اساطير
لسه قاعده ع الحصير
والحرامى يمد ايه ع الخبيز
ياكل فى قوتنا واحنا يعاملنا كالمعيز
كان زمان الاحتلال من الاجانب الانجليز
انهارده الاحتلال مننا فينا سكن
محتاجين احنا الوطن
مش علاء الدين
ولا الشاطر حسن

* قول لحبايبك *

يا كبيره يا ارض العرب
مش بالتاريخ ولا بالكتب
بناس متعرفش الهرب
سر الحياه
فى عيال نفسها طويل قوى
للنيل تحن وترتوى
يا مصر لما بتندهى
بنقف انتباه
وميلى .. ميلى .. ميلى
على كتفى حطى جبال
ده انتى العسل على ويلى
انتى اللى عارفه الحال
ما اخترت عشقك
لكن بلدنا دى بختاااار
قسما بربى وبيكى
لاااا يصلب الثوار
ما دام فينا حياةُُ
صبرا يا اهل الدار
عبثاَ يرانا الجاهل
شعبا بغير قرار
ياربِ هذه بلادى
تشكو بغير دواء
لا ذل من يهواها
ولاضاع فيك رجاء
ويل تَشبُ نيرانى
ثمن الدماء دماء
مصرى ومعجون بالوفا
وحرام فى بلده يتنفى
عارفها حق المعرفه
هو ابنها هو
قول لحبايبك متزعلوش ..
متيأسوش
لسه البلد دى يا ناس حلوه

قصيدة اتختمنا على قفانا

يا كل واحد عاش و شاف و دخلله حزب او ائتلاف قاللك نغير
يا كاره الدولة القديمة
اتعمل فينا السليمة
اسمعوا اخوكوا الصغير
كنا يوم شعبا عظيما
بالشفا .. شكرا .. نعيما..
بالسلامة بلاش تفكر
انك انت كنت الة
يشحنوك انزل تعالى
يلا ثور بالزمبلك
و احنا أول ناس يموتوا
جه زعيم كوكب بلوتو .. بالشياكة بقى الملك ..
بص ليبيا و بص تونس
انت مش سيدنا يونس دول في بطن الحوت راموك
وقفوا جنبك قالوا " يسقط "
و انت بس اللي بتسقط دول أول ناس باعوك
و انت يتلملم في عارك
قالوا دي تركة مبارك .. نعمل ايه في تلاتين سن
بعد ما عصرنا اللمونة طلعوا لسانهم هاتونا
انا من بعدي أنا
و المعارضة هي هي
يلا حِل التأسيسية
في انتظار حكم القضية اللي في فلوسنا اختلس
ادوا للمجرم براءة و اكتبوا الجوع على البطاقة
القصاص يا التراس !
فين حقوق الشهدا إقطع في الطريق ياكش تولع
و البلد تولع بجاز و المواطن شَد شعره
بين حكومة جايبة خبره و " جبهة الإنقاذ "
امتياز تاخده بجدارة
مين اللي وقّع في العمارة و مين خبط اوتوبيس في قطْر
دول فلول.. لأ بلطجية
دول عسكر حرامية
و احنا أشرف ناس في مصر !
دول طرف تالت .. غريبة !
دقن مرسومة و زبيبة
و الكلام كله بحماس
كله كان تخطيط معلم
كله بالصندوق يا فندم
و اشربوا الصندوق يا ناس
كرهونا في عيشتنا
و اما جُم و احتلَوا بيتنا .. خرجونا على التابوت
ادوا ضمائرهم اجازة
ضربوا نار عند الجنازة موت و بيسلّم لموت
و اما يعني العَك طوّل فرضوا حظر التجوّل
تعليمات سيدنا الرئيس اللي بيزود مرارنا
بكرة هيبيعوا في اثارنا و يقفلوا قناة السويس
و انت زي الباشا واقف
و انت زي الباشا تهتف
حضّر العفريت و لكن
شوف بقى مين اللي يصرف ..
و انت زي الباشا واقف
و انت زي الباشا تهتف
باعوا في الماضي سيادتك
اعمل ايه بماكنتش اعرف ! ..
فرق شَعرة بين اللي سميناها ثورة
و اللي ليه قلبت معانا It's A Big Game
أو مؤامرة
من اللي راضعين الخيانة ..
العيال اللي عارفهم
و اللي قومنا علشان حقوقهم
لسة أحلامهم جعانة
فالحمد لله اللي وفّى
الحمد لله اللي كفّى
الحمد لله اتختمنا على قفانا ....

* يا رايح بلدنا *

حراكاته انجازاته .. فعلا عالمي !
يا شعبنا اطلب و اتمنى و يا بلدنا احلمي
بكرة هنبقى الصين و اوروبا
و نجيب المصري من الغربة
بلدي حزينة و فعلا صعبة
في بلدك تترمي
روحنا و جينا على قصره
ولا قال ادخلوا
دة بيكلمنا على " تويتر " بعملله " فولو " ..
دة مهنينا و مستتنا
و احنا اللي الله يخرب بيتنا
بنعمل دوشة و نعمل فتنة
و بعدين تزعلوا ! ..
يا هوه يا هوه
يا مثبت العقل على الراس
في الدنيا فيه في العالم ناس
بالشكل دة لا مافيش يا سلام ..
يا بختنا خِلص البنزين
مش مشكلة حلايب شلاتين ..
ولا حتى أكل العيش يا ولاد
الصوت بيسري و لينا ميعاد
هنموت نموت و بلدنا تعيش .....

حدوته

ابني الصغير اللي مش فاهم تعالى
الحمد لله أني عايش
ارمي يا ابني كتاب تاريخك في الزبالة
واسمعاللي هقوله ليك
يحكى أن
أن أيه ؟
يحكى ان عنده فيلا الحيطان فيها دهب
والفلوس أكوام تلال الماظات وآثار ومال
مستحيل تعرف تعده
انبسط يا عم عبده
اللي هينوبك حوالي 600 الف ألا 100
واللي هينوبني شبهم
جيه الآوان يا اصحابي نحرق كل أمنينا القديمة
الشتا هقضيه في سويسرا .. والربيع هبقى في مرينا
في ملثم جوا سينا كل يوم عملية شكل
لسه في اشتبكات وقتل
لسه نفس الغلطة ليه عمال تكرر
يسقط يسقط حكم العسكر
عمرهم ما يسلموها
انزلوا وزارة الدفاع
بس برضه ده جيش بلدنا
انت قابض انت خاين
اقتلوا فلان اللي باع
اللي خان الشهدا للقضية
يسقط يسقط حكم العسكر كل العسكر دول حرامية
المذيع في الشاشة يسقط
العيال في الحارة يسقط
بوسترات الشهدا فيها كتبوا يسقط
برضه يسقط كل حاجة إلا نفسي
حتى نفسي برضه تسقط
لقيتني ماشي هتافي يسقط
زي زي الباقي يسقط
أي خاين للشهادة يبقى برة
ثورة لسه مستمرة
ضد كل الفاشية اللي المستبدة
خلصت العدة وعادي
مش مهم مين اللي مات
المهم ان بلادنا بقى فيها انتخابات
معايا يا ابني ؟
كل واحد من اللي كانوا مرشحين
جي بالموضوع اللي هو جاي بمشروع
اسمه نهضة
قالنا يا ابني ان مصر في ظرف 100 يوم
هتبقى خالية من الزبالة
مـ المشاكل مـ الهموم
اما بالنسبة لحق اللي اتقتل
ده في عيني في رقبتي
ده في قلبي في الصميم
الكلام كان في السليم
كان بيطلع في البرامج كلمة واحدة
شعب مصر العظيم
انتخبني واوعوا تنتخبوا الفلول دول و دول
ايوه هكسب وان خسرنا
بالصلاة على النبي
مصر دي هتبقى خرابة
مصر راحت للديابة
والوطن بقى شيئ مخيف
يا لطيف .. فيه كده ؟
احنا خدنا غرضنا غوروا
الرئيس الملتحي ابو دقن طالع من سنين
اخبطوا دماغكم وثوروا
جلدنا يا عالم تخين
قرد قرداتي وصوابع
حارة مزنوقة الحزين
عملوا ثورة جوا حارة
كتبوا فيها الاستمارة
حارة حارة وبيت بيت
قالك الشرعية ملكي ايوه قسمنا
ابن التيـــــــــت
من يوميها واحنا مش عارفين نعيش
لولا ستر ربنا ان في فـ بلادنا جيش
جنب ناسها الطيبين
كان زمنا متهانين ...
بابا كان صايع ومش لاقي الجنيه
فجأة كان بيناجي همه جوا شلة جوه قهوة
لاقى نفس المشكلة عن الزمايل
اللي كان قاعد بيشرب واللي كان عامل مناضل
واللي قضى العمر قاعد جوا سيبر
كان يكلم اي واحدة من الاجانب
نفسه لو تبعتله فيزا
البلد دي مش عزيزة
نفسي أسافر
نفسي اهاجر
نفسي اروح امريكا نفسي
نفسي أعيش نفسي يا عالم
جالنا مين وهمس في ودني وقالي لازم
أنزل امشي في الشوارع قول يا ثورة
وانت هتلاقي المواجع تختفي ده الحق راجع
انزل اهتف عيش تلاقي والكرامة الكل سامع
كل مصر بتنتفض
النهاردة يوم الولادة
انت يا تجيب فجر بكرة يا أما هتنول الشهادة
مين بيضرب نار ومين
مين اللي خان مين اللي فتح في اللومان
مين بيقتل ؟
وانت مالك
انزل اهتف عيش كرامة وزود ارحل
سالي ماتت
يلا أرحل .. أيوه أرحل
يلا حالاً .. أيوه حلاً
يلا now .. أيوه now
يلا أسقطنا النظام
قام هامسلي وقام يغني أنت ورد اللي مفتح في الجناين
كان معايا وجنب مني صدقوني مكنتش اعرف انه خاين

ايديك ماهيش طايلة توصل تجيب الشمس
كلم شهيد صاحبك في وحدتك بالهمس
قول له انت ليه عالي
هيرد و يقول لك
العمر زي السلالم وانا دوست فوق الامس
و لاقيتني فوق في السما
شوف انت كام سلّمة طلعتها بتجري
رجليك اهي معلمة
مشيت على اربع و فضلت متسربع
اهبل بأعد السنين
و مشيت على اتنين رغم ان انا واحد
و بقينا ليه فريقين ماسكين لبعض سلاح
لا اللي قتل مرتاح ولا القتيل واخد تذكرته على الجنّة
اسمع بقى استنى ..
ماانتش شهيد لو مُتت و في نيتك قتلي
ماحناش عبيد للصمت لكن باصون اهلي
اعذرني لما نزلت اهتف باقول ارحل
عن نفسي كنت طهقت و ماقداميش فرصة
صدقني كان لازم انت اللي مش فاهم
انا شوفتها ثورة و شوفتني مؤامرة
اسقاط رئيس و انقلاب
خونة و فلول وكلاب
بس اللي مش واصل اني مانيش زيك
مابكيش على قاتل
بس اللي مش واصل اني مانيش زيك
ماابكيش على فاشل
اني ماخوفتش اقول في عز جبروته
كنت انت بتجامل لوحتى بسكوتك
مازعلش على نفسي و ازعل اوي لموتك
دة لان انا مصري
لا ضعيف ولا مخلّط
مش عيبة تبقى عبيط العيبة تستعبط ! ..

قوللي يا ابني احنا ليه بنحب مصر
يلا قول يا حبيبي ليه فجأة سكتت
يا ابني اتقل حمل في الدنيا السكوت
بسأله قلدلي صوت القطر
قام قايللي توت ! ..
من يوميها بسأله مابقاش يرُد
هسأله لما هموت !
انتو عارفين بس لو دول مش عيال
كان زمانهم قالو عملا مُمَولين
كان زمانهم قالوا جايين من ايران
عملا جواسيس انما متدربين
كان زمانهم لفّقولهم اي تُهمة
شعبنا ممكن يصدق اي حاجة
و كل حاجة و اي كلمة
بس باسم الدين ! ..
جبنة نستو يا معفنين الله اكبر
تم ضبط اتنين لمون الله اكبر
تم فض الاعتصام بسبع قرود كلب و زرافه الله اكبر
شوف السخافة !
بس فيه اللي مصدق تبريرات و حجج فظيعة
اقسم برب العزه لو دول مش عيال
كان زمانهم قالوا دول ضد الشريعة ! ..

من قصيدة اتحدوا او موتوا


بتقوللي حرية و كرامة ليه مافيش !!
علشان سيادتك لما بترخص بلد ..
انت كمان بتكون رخيص ..
علشان هتفنا الشعب أسقط النظام ..
اشرب بقي وماتقولش لا ..
ادي النظام لما سقط ماسقطش وحده ..
انما واخدك معاه ..
قُصر الكلام انت النظام ..
و انت اللي سقّطته و انت بتنشأه ..
و انت اللي غميت في عينيك جنابك ..
و هما بيحرقوا ..
و انت اللي جهل ساعدتهم يتحاموا فيك ..
او يسرقوا ..
ماتقولش سرقوا الثورة مني و كنت جاهل ..
ده انت المناضل اللي نافش ريش ..
عم النشيط المتفائل ..
قالوا الجعان يحلم بسوق العيش ..
عمرك لاقيت واحد مع بقال بيقول له نص دييمقراطيّة ..
و رُبع عدل و بجنيه كرامة !!!
بتقول لمين قبل اما تلبس في الكوفية ..
و تاخدوا حبّاية الشجاعة ..
اسأل ابوك المحترم رباك منين وعمللك ايه ..
اسأل ابوك و امك اتحاملوا قد ايه علي نفسهم ..
علشان تدوق طعم الهنا ..
اتغربوا كدة كام سنة ..
علشان سيادتك لما تكبر بكل كِبر و عنجهة ..
رافض تعيش جوا البلد رافض البلد ..
و تقوللي بكرة هتبقي احسن ..
ازاي وانا شايف ولد عمال يهد !!
عمال يشد و يتفرد !!
علي اقرب الناس ليه ..
حق الشهيد عمره ما يرجع بالكلام و الاعتصام ..
ولا اني ازود في عداد الميتين ..
و اقفل بيبان ..
الحق بان ..
وانت حافظلك كلمتين ..

حق الشهيد حق الجهاد ..
كتروا العبيد احنا في مزاد ..
و الكل مربوط من رقبته في الجثث
و الكل نصّب نفسه للثوره حرس
و الكل ماشي بالجرس ..
الائونا .. الاديو .. الاتريه ..
عم النشيط انا مش هقولك
خدت كام او ايه ..
الائونا .. الاديو .. الاتريه ..
البيت بيولع و انت ماسك اخوك ..
النار بتمسك فيك و تمسك فيه ..
للا ئونا .. الا ديو .. الا تريه
مين يشتري بلدي و تسوي قد ايه لتر دم
و بالتعود عَشَرة لتر و مين يزود ..
اقدم بلد في الدنيا تسوي كتير مية ألف اتنين تلاتة
و احنا خيال الماتة ..
نخوّف العصافير وحوش يا دوب علي نفسنا
و فران بقالنا كام سنة بنتزق علي طوابير ..
وقف انتحاري تاني وقصاده كاميرا ياباني
و سلاحه روسي الصنع وقف يقول الشهادة ..
هقتل عبيد البيادة ماتفوق بقي.

يا اللي بتقولوا الشريعة و ياللي بتقولوا ايمان
ايه رأيكو في واحد جعان
ايه رايكو في واحد حلم
لكن حلمه على فاشوش
سامعني يا اصحاب الغنايم ؟!
سامعني يا عم اللي نايم ؟!
قوم و عدد في الخساير
قوم و شوف
اللي فضّوا في الضماير
لجل يملوا في الكروش
سامعينني يا اصحاب البدع ؟!
احنا ولا غيرنا اللي حاسين بالوجع
و ازاي على اخر الزمن
نبقى التمن اللي تملي بتدفعوه ساعة الغضب
احنا السبب !

قصيدة السلام على من اتّبع الهُدى

السلام على من اتّبع الهُدى ..
السلام على عيون متأكدّة
انه برغم الحزن لسّاه الأمل ..
باقية مصر بشعبها مُتَفَرّدة ..
باقية مصر بجُندها و عُلما و أطّبّا ..
باقية يا مصر بناسها و بلَمّ الاحِبّة ..
باقية مصر في قلب حارس على الحدود ..
باقية مصر حكاية يحكوها الجدود
عن فراعنة و عن و عن ..
عن حضارة و ذوق و فن ..
عن طموح ماعرِفش حاجز ..
عن قاموس مافيهوش ثلاث كلمات
" مستحيل .. مهزوم .. و عاجز " ..
عن ايدين سمرة لعيال حالفة تبني ..
عنّي شخصيا يا خال لمّا بقرا الشِعر لابني ..
عن نجيب محفوظ و دُنقل ..
عن فؤاد نجم و هكمّل عن بشر مش مشهورين
كل واحد حط بلده في العينين ..
كل جُندي و كل حارس ..
كل طالب في المدارس ..
في الجوامع في الكنائس ..
كل شعبي الحُر كل الحالمين ..
السلامُ عليكِ يا مِصرُ السلامةُ
رُغمَ أنفِ المُعتدين و الحاقدين ...

فين بقى اللي كان معايا
و سمّيتهم جماعة ..
فين بقى اللي كانوا جنبي
و اللي سكنوا في حُضن قلبي
و شيلتهم فوق الدماغ ..
ليه مافيش الا الفراغ ! ..
النهاردة لوحدي قاعد بكتفي بدور المُشاهد ..
اختيارهم ليّا كان صَح و غَلَط ..
لما كان البيت إزاز ليه تحاوطوه بالزلط ! ..
ليه تسيبوا الناس دي ترمي و ليه زعلتوا اما اتخَبط ..
النهاردة شوفت صوري كنت واقف وسط لمّة ..
الصحاب مابينفعوش ..
بتلاقيهم بس لمّا تضحك الدنيا ..
تكشّر يبعدوا عنّك
يا إما اللي كتّر خيره واسى
و اللي قاسى معاك بكِلمة ..
طفل كان بيحب " بوجي "
و كان يخاف من أي ضلمة ..
طفل أبعد ما يكون عن الجنون ..
طفل نضارته السّبب في وقوفه جون ..
علّموه الوِحدة بين عارضة و شَبَك ..
علّموه ينصاد لحد اما اتشبك ..
خد على التّكتيفة لو كان حُر مات ..
اختيارك من دماغك دي بقى اللي مُحرمات ..
اختيار يعني تفاضِل بس لو كان اللي فاضِل
يمنع العُمر انه يجري ..
كنت مفعول به و عُمري عُمري
مرّة ما كنت
فاعل .

عندي من الاولاد تلاتة او يزيدوا في المدارس
عندي عيل كل يوم الصبح عايز
في المرايا لوحدي باصص
صوت في احلامي بيهتف انت عاجز ! ..
جتلي ساكتة
ابن نكتة اللي دهن الدنيا دوكو
و عبّى شمسه في الازايز
النهاردة لوحده خايف
النهاردة فتح جرايده
بص علي ركن الوظايف
الامير ابن الاميرة يطلب الدكتور فلاني
لجل ما يغير لعيل ولا يغسل في الاوني
خد بطاقته ولف لفة على المواني
وابتدا يبعت رسايل
اسمي .. اسم الاب .. اسم الام .. اسم الجد .. اسم العيلة
حاجة
الوظيفة .. اي حاجة
المرتب .. اي حاجة
الشهادة .. اي حاجة
البلد .. جنسيتي
و سكتت نزلت دمعتي
مصري كان يوم احلى حاجة ! ..

ده احنا شبعنا من الكلام
من نفسها السحنه
مش وقت بكره الجاي اجمل
من اللي فات
ولا وقت سوف
واننا والمجد والهتافات
ده وقت شوف نفسك
وسبنا نشتغل
ده وقت شوف حالك
وسبنا نشتغل
يمكن ياسيدنا نبتدي
ونعدي من المحنه
دنيا واهي بتلف
واللي اترمى على الارض
مين عالم يكون في السقف
بكره التقيل هيخف
بكره المريض هيخف
والنيل ده مش هيجف
والطفل مش هيكف
عمره عن البكا
لو كان جعان
والشعب مش هيتف
الا على الجبان
وانا بابي لو مكسور
ايه لازمته المقبض
مانا لو رضيت اقبض
فالخزي كل العار
ياللي اتحسبتوا مننا
وسموكوا من الثوار
بريئه من ظلمكم من خزيكم ثوره
بعيده عن حلمكم عن دقنكم ثوره

من قصيدة متزعلوش مصر

نرل امشي في الشوارع
قول يا ثورة
و انت هتلاقي المواجع تختقي دة الحق راجع ..

انزل اهتف عيش تلاقي
قول كرامة الكل سامع
كل مصر بتنتفض !
النهاردة يوم الولادة
انت يا تجيب فجر بكرة يا اما هتنول الشهادة

مين بيضرب نار و مين
مين اللي خان
مين اللي فتح في اللومان
مين بيقتل
و انت مالك ؟!

انزل اهتف عيش كرامة و زود ارحل
سالي ماتت الكلام
يلا ارحل ايوة ارحل
يلا حالا ايوة حالا
يلا Now ايوة Now
يلا اسقطنا النظام ..!

النهاردة شوفت صوري كنت واقف وسط لمّة ..
الصحاب مابينفعوش ..
بتلاقيهم بس لمّا تضحك الدنيا ..
تكشّر يبعدوا عنّك
يا إما اللي كتّر خيره واسى
و اللي قاسى معاك بكِلمة ..
طفل كان بيحب " بوجي "
و كان يخاف من أي ضلمة ..
طفل أبعد ما يكون عن الجنون ..
طفل نضارته السّبب في وقوفه جون ..
علّموه الوِحدة بين عارة ضو شَبَك ..
علّموه ينصاد لحد اما اتشبك ..
خد على التّكتيفة لو كان حُر مات ..
اختيارك من دماغك دي بقى الليمُحرمات ..
اختيار يعني تفاضِل بس لو كان للي فاضِل
يمنع العُمر انه يجري .
كنت مفعول به و عُمري عُمري مرّة ما كنت فاعل ..
كنت ياما اخدع في نفسي
و اكتب العُمر اللي ماضي بالسنين
اتنين تلاتة خمسة عَشَرة ..
السنين توجع و تجري
و الزمن بطبيعته قاضي ..
الحقيقة اني دايما كنت بكتب عُمري
صِفر و جانبه
فاضي ! ....

جميلة .. تسلم ايدك ..