طبعا مش هاقدر أناقشك أو أجادلك فى إن جوازك تانى حلال وطبقا للشرع، وأنت
أدرى واحد بظروفك وبوضعك، عشان كده مش هاحاول أثنيك أو أبعدك عن القرار ده،
لكن خلينى أفكرك أنه مفيش حد بياخد كل حاجة، هى الدنيا كده، تكسب حاجه
بتخسر أدامها حاجه تانية، تاخد حاجة، يبقى تسيب فى مقابلها حاجة، دور
(الرابح دائما) ده للأسف غير متوفر فى لعبة الحياة، المهم إن إحنا نوازن
بين إلى هانكسبه وبين الثمن إلى هاندفعه فى المقابل.

لازم يكون واضح فى ذهنك إن علاقتك بابنك هى الثمن إلى هاتدفعه فى مقابل هذه
الجوازة الجديدة، لأنه سواء زوجتك انفصلت عنك، أو بقيت على ذمتك، فعدم
رضاها عن تصرفك هاينعكس بكل تأكيد على ابنك، وهاتلاقيها مهما حاولت أنت
بتعكر صفو علاقتك بابنك، ومش هاتهنيك عليه على أد ماتقدر، سواء وافقنا على
تصرفاتها دى أو لم نوافق ده إللى هايحصل، لأنها هاتكون عايزه ترد لك الألم
الى سببته لها، وأول وأكبر سلاح فى إيديها هو حرمانك من ابنك.

وبالتالى فكر بهدوء و قرر بنفسك، هل ما أنت مقبل عليه يستحق هذا الثمن؟ شيل
من دماغك إنك تاخد كل حاجة، وإنك تتجوز وتعيش الرومانسية والحب والسعادة
مع الجديدة، وفى نفس الوقت ترجع تلاقى ابنك تمام التمام وزى الفل مع
القديمة، انسى، ده ممكن مع نوع معين من الزوجات، اللى ممكن تيجى على نفسها
وتتحمل لكن لفترة ما برضه، وليس إلى الأبد عشان خاطر ولادها، لكن مراتك
كانت واضحة من الأول وقالت لك إنها مش كده، يبقى أنت دلوقتى إللى المفروض
تقرر وتختار.

وبعيدا عن حقوقك الشرعية، وعن إن الجواز الثانى والثالث بل والرابع حلال،
لكن حط نفسك مكان زوجتك، فجأه تلاقى واحدة تانية بتشاركها فى جوزها، وفى
دخلها، وفى حياتها كلها، وياريتها هاتكون مشاركة عادلة، دأنت بتحب التانية
ومابتحبش الأولانية، يبقى عايزها تحس بأيه؟ وتتصرف إزاي؟ رد فعلها طبيعى
جدا وإنسانى جدا، صح بقى ولا غلط، مش هى دى النقطة، المهم إنه متوقع جدا
منها ومن كثيرات غيرها.

كمان حط نفسك مكانها من ناحية تانية، لو هى كمان اتجوزتك جواز تقليدى،
وعاشت معاك وخلفت منك، وماشفتش منك أى شئ وحش، وفجأه جت تقول لك (والله أنا
عمرى ماحبيتك، ودلوقتى قابلت الإنسان إللى حسيت معاه بالحب والسعادة لأول
مرة فى حياتى.. باى باى)، هايكون رد فعلك إيه؟ هاتفكر فيها إزاي؟ مش
هاتوصفها بالخيانه، والغدر، أو على الأقل بالجحود وإنكار المعروف؟ هى كمان
حاسة منك كده، هاتقول لى الراجل غير الست، والراجل ممكن يتجوز أكتر من
واحدة لكن الست لأ، هاقولك صح مضبوط، لكن المشاعر الإنسانية لا تعرف المنطق
والصح والمضبوط، الست دى حاسة منك بالغدر والخيانة وعدم تقدير العشرة،
بصرف النظر عن أى حاجة تانية.

إضافة إلى أن موضوع (تعدد الزوجات) ده زيه زى مواضيع تانية كتير، بيتأثر
جدا بقبول المجتمع له، يعنى ممكن يكون مقبول جدا وعادى فى بعض المجتمعات
(الخليجية)مثلا، وغير مقبول فى مجتمعنا (المصرى)، ومجرم قانونا فى مجتمعات
كما فى (المغرب) على سبيل المثال، وهكذا.

حاجة أخيرة عايزة أقولهالك بينى وبينك كده، هل أنت شايف نفسك تصلح زوج
للاتنين؟ يعنى أنت بتقول إنك مش بتحب مراتك، وعايز تستمر معاها بس عشان
الولد، يعنى باختصار أنت عايزها أم و مربية لابنك، مش أكتر، فى حين أن
الجديده بتحبها وبتكون سعيد معاها، وأكيد عايز تعيش معاها كل مظاهر الحياة
ومباهجها، يبقى بالأمانة كدة هاتقدر تعدل بينهما؟ تعدد الزوجات حلال آه،
وحقك آه، لكن العدل بينهم شرط أساسى لجواز هذا التعدد، وإلا هاتعرض نفسك
لعقوبة كبيرة من ربنا فى الآخره على الأقل، إن لم يكن فى الدنيا أيضا، لأنك
هاتميل كل الميل إلى من تحب وتهوى، وتبقى الأخرى كالمعلقة، أو يعنى زى ما
إحنا بنقول بالبلدى كده زى (البيت الوقف)، وده أكيد أكيد شىء ما يرضيش
ربنا.

أنا باعتذر لك، أنا مقدرش أقنع مراتك، وأنت نفسك ما تقدرش تحكم على الآخرين
إنهم يتصرفوا زى ما أنت عايز عشان يحلوا مشاكلك، أنت الوحيد إللى لازم
تفكر وتقرر وتحل مشاكلك بنفسك وليس الآخرين.

معلش كلامك مش منطقي
زي ما قالت دوللي حنحكى بعيد عن الشرع وعن ان ده حق من حقوقك لكن انت ما كنتش صادق مع نفسك من الاول مدام مش حاسس بيها اتجوزتها ليه ونفترض اكتشفت ده بعد الجواز خلفت ليه كان ممكن تاجلو موضوع الخلفة مدام احساسك مش مستقر وهلاء بعد عدة سنين وعندك ولد تقول مش حاسس بيها وحبيت واحدة تانية لا اعزرني انت تقبل الكلام ده عليك ما هى انسانة برضه وممكن تكون مش حاسة بيك لكن هى مش ممكن تعمل كده لانها حتفكر بابنها وبيك وبنفسها والناس الى حواليها لكن انت ما فكرت غير بنفسك ولما افتكرت ابنك بتقول اعمل ايه تفتكر الى بيبيع مره مش حيهون عليه يبيع تانى انا معاك ان الحب والتفاهم حلو لكن مافيش حاجة كاملة الكمال لله واحده والانسان مش ممكن يحصل على كل شئ بمنتهى البساطة لكن في مشكلة تالتة ان زوجتك اكيد اتهزت ثقتها بيكوده حيسبب مشاكل كتير وسدقنى مراتك وابنك اولى بمشاعرك وحبك انت عاشر مراتك وعرفت عقلها وعرفت طبعا وهى كمان عرفت طبعكفماتعرفش الانسانة الجديدة حيكون ايه الحياة معاها بعد الجواز وخلي بالك الحب مراية عمياء يعنى مش حتشوفو عيوب بعض الا بعد الجواز والعشره والى نعرفو احسن من الى مانعرفهوش لكنى مش حعرف اقنع زوجتك لانى متعاظفة معاها واقيدها الرئي بالاخص لانها حكت بكل صراحا
طبعا نحنا ممكن نحكى من هلاء لبكرا مش حنخلص كلام لكن
خير الكلام ما قل ودل
اعزرني اخي لو كلامى كان قاسي عليك لكن انا بقول رئيي وانت ليك القرار
اشكرك يا دوللي على لانك اتحتى لنا الفرصة على المشاره والرئي

و الله كلامك كله عين العقل يا لولو
بس يعنى انا مش عارفة ليه الزوج حط نفسه ف الموقف ده من البداية
يعنى هو ليه مشي طوع اهله زى ما بنقول طالما هو عارف انه مش هيكون فى مقدرته الصمود
الجواز بالذات مفيهوش مجال لا لخواطر ولا مجاملات
و طالما الامر كده
يبقى يروح يخلى الست والدته اللى اختارت له هى اللى تقنع زوجته بالموضوع ده
مشكورة على المرور يا لولو